Mbahet Konferenca e Sigurisë në Gjermani/ Detaje nga agjenda dy ditore e liderëve botërorë

14 Shkurt 2025, 17:49, Kosova & Bota CNA

Mbahet Konferenca e Sigurisë në Gjermani/ Detaje nga agjenda dy ditore

Po mbahet në Gjermani Konferenca e 61-të e Sigurisë në Mynih, e cila do të zhvillohet nga 14-16 shkurt.

Konferenca dy ditore do të fokusohet kryesisht në luftën e Rusisë kundër Ukrainës. Tema të tjera kyçe përfshijnë energjinë, ndryshimet klimatike, inteligjencën artificiale dhe tregtinë ndërkombëtare.

Më shumë se 60 krerë shtetesh dhe qeverish dhe mbi 100 ministra po marrin pjesë në konferencë.

Por çfarë parashikon agjenda e konferencës për liderët botërorë

Sot nisi programi kryesor i konferencës, me fokus sfidat e sigurisë globale, duke përfshirë qeverisjen globale, qëndrueshmërinë e demokracisë, sigurinë klimatike dhe shumë tema të tjera.

Të shtunën, më 15 shkurt, do të zhvillohen debate për gjendjen e rendit ndërkombëtar, si dhe për konfliktet dhe krizat rajonale. E ardhmja e partneritetit transatlantik do të jetë gjithashtu një fokus kryesor i ditës së dytë të konferencës.

Të dielën, më 16 shkurt, konferenca do të përmbyllet me diskutime mbi rolin e Evropës në botë.

Orari i fjalimeve kryesore në Konferencën e Sigurisë së Mynihut 2025:

Presidenti Federal gjerman Frank-Ëalter Steinmeier - 14 shkurt, 14:35-14:55

Presidentja e Komisionit Evropian Ursula von der Leyen – 14 shkurt, ora 15:00-15:30

Zëvendëspresidenti i SHBA JD Vance – 14 shkurt, ora 15:30-16:00

Presidenti ukrainas Volodymyr Zelenskyy - 14 shkurt, 16:30-17:15

Përfaqësuesja e Lartë e BE-së për Politikë të Jashtme dhe Siguri Kaja Kallas – 14 shkurt, ora 16:30-17:15 dhe 19:00-20:00

Kancelari gjerman Olaf Scholz – 15 shkurt, 12:30-13:30

Kandidati për kancelar gjerman Friedrich Merz – 15 shkurt, ora 12:30-13:30

Presidenti i Këshillit Evropian António Costa – 15 shkurt, ora 12:30-13:30

Sekretari i Përgjithshëm i NATO-s Mark Rutte – 15 shkurt, ora 13:30-13:45

Presidentja e Parlamentit Evropian Roberta Metsola – 15 shkurt, ora 19:30-20:15; 16 shkurt, ora 11:30-12:15

I dërguari i posaçëm i SHBA për Ukrainën dhe Rusinë, Keith Kellogg – 15 shkurt, 19:30-20:15

Konferenca e Sigurisë së Mynihut (MSC) është një forum vjetor ndërkombëtar i dedikuar për të diskutuar çështjet urgjente të sigurisë.

E themeluar në vitin 1963, ajo është kthyer në një platformë kyçe për shkëmbimin e pikëpamjeve ndërmjet përfaqësuesve të vendeve të ndryshme në mbarë botën. Çdo vit, MSC mbledh politikanë, zyrtarë ushtarakë dhe organizata të ndryshme qeveritare dhe joqeveritare ndërkombëtare për të diskutuar çështjet e politikës së jashtme, sigurisë dhe mbrojtjes./CNA