Papa Leo paralajmëron botën për rreziqet e inteligjencës artificiale

25 Maj 2026, 12:51, Kosova & Bota CNA

Papa Leo paralajmëron botën për rreziqet e inteligjencës

Papa Leo ka publikuar dokumentin e tij të parë madhor, enciklikën “Magnifica Humanitas” “Njerëzimi Madhështor”, ku paralajmëron se zhvillimi i pakontrolluar i inteligjencës artificiale mund të përbëjë një kërcënim serioz për demokracinë, paqen dhe të drejtat e njeriut.

Në dokumentin prej rreth 43 mijë fjalësh, Papa thekson se fuqia teknologjike po përqendrohet gjithnjë e më shumë në duart e kompanive private dhe transnacionale, të cilat shpesh kanë më shumë ndikim sesa vetë qeveritë. Sipas tij, ky përqendrim i pushtetit krijon rrezik për manipulim, varësi, përjashtim social dhe pabarazi të reja.

Ai kërkon krijimin e kornizave të forta ligjore ndërkombëtare për të kontrolluar përdorimin e inteligjencës artificiale, duke theksuar se “nuk mjafton vetëm të flitet për etikë”, por nevojiten mbikëqyrje e pavarur, transparencë dhe përgjegjësi politike.

Në pjesën kushtuar luftës, Papa paralajmëron se revolucioni dixhital po ndryshon natyrën e konflikteve moderne. Ai përmend sulmet kibernetike, manipulimin e informacionit dhe automatizimin e vendimeve ushtarake si rreziqe që mund të ulin pragun për përdorimin e forcës dhe të normalizojnë luftën.

“Zhvillimi dhe përdorimi i inteligjencës artificiale në luftë duhet t’i nënshtrohet kufizimeve më të rrepta etike. Nuk është e pranueshme që vendime vdekjeprurëse t’u besohen sistemeve artificiale”, shkruan ai.

Enciklika trajton edhe ndikimin e inteligjencës artificiale në demokraci, edukim dhe tregun e punës. Papa shpreh shqetësim për përhapjen e dezinformimit dhe thekson se indiferenca ndaj së vërtetës mund të çojë drejt formave të reja të totalitarizmit.

Ai paralajmëron gjithashtu se automatizimi dhe robotika po transformojnë me shpejtësi tregun e punës, ndërsa fitimi ekonomik nuk duhet të justifikojë humbjen masive të vendeve të punës apo dobësimin e rolit të njeriut në ekonomi.

Në fund, Papa bën thirrje për bashkëpunim ndërkombëtar dhe strategji të përbashkëta globale për të mbrojtur shoqëritë më të pambrojtura nga pasojat e inteligjencës artificiale./ CNA