E fundit!

21:48 Aktualitet

Tubimi i 28-të kundër qeverisë/ Protestuesit nisin marshimin në rrugët e Tiranës

Protestuesit janë larguar nga Kryeministria dhe kanë nisur...

Osmani diskuton me Prattipatin për "hapat drejt konstituimit të plotë" të Kuvendit

28 Gusht 2025, 22:53, Kosova & Bota CNA

Osmani diskuton me Prattipatin për "hapat drejt konstituimit të
Presidentja e Kosovës, Vjosa Osmani, ka diskutuar me të ngarkuarën me punë në Ambasadën amerikane në Kosovë, Anu Prattipati, për hapat drejt përmbylljes së procesit të konstituimit të Kuvendit të Kosovës.

Seanca konstituive për legjislaturën e dalë nga zgjedhjet e shkurtit ka nisur më 15 prill, por edhe nuk është përmbyllur.

“Gjatë takimit u diskutua për zhvillimet e fundit në vend, përfshirë zgjedhjen e kryetarit të Kuvendit dhe shumicës së nënkryetarëve, si dhe hapat e mëtejshëm drejt konstituimit të plotë të Kuvendit”, u tha në njoftimin e lëshuar nga Presidenca e Kosovës.

Në të kaluarën, Prattipati ka thënë se ngërçi politik po i shkakton humbje të mundësive për Kosovën, ndërkaq Osmani e ka vlerësuar si “urgjencë shtetërore” konstituimin e Kuvendit.

Pas muajsh bllokadë, më 26 gusht deputetët e Kuvendit të Kosovës zgjodhën Dimal Bashën nga Lëvizja Vetëvendosje në postin e kryetarit të Kuvendit.

Më pas, përmes një votimi në pako u zgjodhën edhe tre nënkryetarët nga partitë shqiptare: Albulena Haxhiu nga Lëvizja Vetëvendosje, Vlora Çitaku nga Partia Demokratike e Kosovës dhe Kujtim Shala nga Lidhja Demokratike e Kosovës.

Por, votimi për dy nënkryetarët e komuniteteve joshumicë, me kërkesë të deputetit Elbert Krasniqi, u bë i ndarë – e jo në pako, siç ishte bërë në të kaluarën.

Kështu, nga radhët e komuniteteve joserbe, Emilija Rexhepi u zgjodh në postin e nënkryetares. Por, çështja ka ngecur te zgjedhja e nënkryetarit të pestë, nga radhët e komunitetit serb.

Lista Serbe – partia e serbëve që ka fituar nëntë nga dhjetë ulëset e rezervuara për komunitetin serb – propozoi Sllavko Simiqin për postin e nënkryetarit. Më 26 gusht, ai nuk arriti të merrte 61 votat e nevojshme.

Pas kësaj, kreu i ri i Kuvendit, Dimal Basha, tha se emri i Simiqit nuk mund të hidhej në votim, duke u thirrur në aktgjykimin e fundit të Gjykatës Kushtetuese.

Më pas ai, i hodhi në votim kandidatët e tjerë përmes shortit, përfshirë edhe emrin e Nenad Rashiqit, kryetarit të Partisë serbe për Liri, Drejtësi dhe Mbijetesë, i afërt me kreun e Lëvizjes Vetëvendosjes, Albin Kurti./REL