Njohja e Kosovës nga Kenia/ Osmani: Së shpejti vendosim marrëdhënie diplomatike

26 Mars 2025, 15:51, Kosova & Bota CNA

Njohja e Kosovës nga Kenia/ Osmani: Së shpejti vendosim

Presidentja e Kosovës, Vjosa Osmani ka përshëndetur njohjen e pavarësisë së Kosovës nga Kenia. Në një postim në rrjetet sociale, Osmani shkruan se marrëdhëniet mes dy vendeve do të thellohen dhe thotë se shumë shpejt pritet vendosja e marrëdhënieve diplomatike.

Një falënderim për njohjen e Kosovës nga Kenia, Osmani e ka dhe për ish-presidentin Behgjet Pacolli, për angazhimin e vazhdueshëm. Osmani shprehet se mes Kosovës dhe Kenias do të ndërtohet një partneritet i fortë dhe afatgjatë.

“Republika e Kosovës mirëpret vendimin e Republikës së Kenias për ta njohur Kosovën si shtet të pavarur dhe sovran, nëpërmjet vendimit të nënshkruar nga Presidenti Ruto të dërguar zyrtarisht pak më parë në Presidencë.

Kjo njohje është një dëshmi e mbështetjes së vazhdueshme për të drejtën e popullit të Kosovës për liri, pavarësi, sovranitet dhe integritet territorial. Njëkohësisht është edhe njohje e vuajtjeve të gjata e sakrificës shekullore të popullit të Kosovës për liri.

Në emër të institucioneve dhe qytetarëve të Kosovës, shpreh falënderime të sinqerta ndaj presidentit të Kenias, Ëilliam Ruto, për këtë vendim të drejtë dhe të rëndësishëm, si dhe ndaj institucioneve dhe qytetarëve kenianë që mbështetën këtë hap të madh diplomatik. Përgjatë këtyre viteve, kam zhvilluar disa takime të rëndësishme me të, dhe në të cilat njohja e Kosovës ka qenë temë kryesore e diskutimeve. Presidenti Ruto vazhdimisht siguronte popullin e Kosovës se vendimi për njohje do të merret shpejtë, bazuar në të drejtën ndërkombëtare dhe në sakrificën e gjatë të popullit tonë.

Një mirënjohje e veçantë shkon për të gjithë ata që kontribuuan në këtë proces. Falënderim të veçantë për angazhimin e vazhdueshëm të ish-Presidentit dhe ish-ministrit të punëve të Jashtme të Kosovës, Behgjet Pacolli. Kosova vazhdon të ecë përpara në rrugën e saj të integrimit dhe fuqizimit të pozitës së saj ndërkombëtare. Marrëdhëniet në mes të Kosovës dhe Kenias do të thellohen në fusha të ndryshme, ndaj presim që shumë shpejt të vendosim marrëdhënie diplomatike, duke ndërtuar një partneritet të fortë dhe afatgjatë në mes dy shteteve dhe popujve tanë”, shkruan Osmani/ CNA