web counter
LEXO PA REKLAMA!

SHKARKO APP

App Store
Google Play

E fundit!

x

Kompani, hotel dhe vila /Pasuria e Millan Radoiçiç kap shifrën e miliona eurove në Serbi

10 Tetor 2023, 09:52, Kosova & Bota CNA

Kompani, hotel dhe vila /Pasuria e Millan Radoiçiç kap

Pesë kompani, ambiente biznesi, një hotel në Kopaonik, një vilë në një pjesë elitare të Beogradit - e gjithë kjo në Serbi është në pronësi zyrtare të Millan Radoiçiçit, sipas hulumtimit të "Radios Evropa e Lirë".

Radoiçiç, i cili publikisht mori përgjegjësinë për sulmin e armatosur ndaj policisë së Kosovës në fshatin Banjskë, e ndan pronësinë me biznesmenin Zvonko Vesellinoviq nga veriu i Kosovës dhe vëllain e tij Zharkon.

Kompanitë që operojnë nga ata fituan mbi 24.5 milionë euro vetëm në vitin 2022, sipas raporteve financiare të analizuara nga "REL".

Janë lidhur kontrata të vlefshme me shtetin me qytetet në Serbi dhe ndërmarrje të ndryshme publike.

Vetëm tri ditë pas sulmit të armatosur në veri të Kosovës, kompania e tyre mori përsipër edhe ndërtimin e një ure në afërsi të Kralevës, në vlerë të rreth një milion eurove.

Qeveria e Serbisë dhe ministria kompetente deri në publikimin e tekstit nuk iu përgjigjën pyetjeve të "REL"-it se mbi çfarë baze kompanitë e Radoiçiçit dhe vëllezërve Vesellinoviq fituan tenderët.

Nuk ka përgjigje as në pyetjen nëse ndërpritet bashkëpunimi me shtetin pasi Radoiçiçi u identifikua si organizator i sulmit në Banjska.

Kompanitë në pronësi të Vesellinoviqit dhe Radoiçiçit nuk iu përgjigjën pyetjeve në lidhje me operacionet dhe asetet.

Edhe para sulmit ndaj policisë së Kosovës më 24 shtator, i cili u cilësua si akt terrorist në Prishtinë, autoritetet kosovare e lidhën Millan Radoiçiçin me aktivitete kriminale. Për krimin në Kosovë ndërlidhet edhe Zvonko Vesellinoviqi.

Por Serbia, e cila nuk e njeh pavarësinë e Kosovës, nuk i njeh as akuzat e autoriteteve të Kosovës.

Sulmi në Banjskë nuk trajtohet si terrorizëm dhe Radoiçiçi nuk akuzohet për vrasjen e policit Afrim Bunjaku në procedurë para Prokurorisë së Lartë Publike në Beograd.

Ndër krimet e dyshuara janë shkaktimi i rrezikut publik dhe mbajtja pa leje e armëve.

Beogradi zyrtar ka vendosur edhe të mos i zbatojë sanksionet e Shteteve të Bashkuara të Amerikës dhe Britanisë së Madhe ndaj Radoiçiçit dhe Vesellinoviqit, sepse për këtë nuk ka detyrime ndërkombëtare.

Ata u futën në listën e zezë të SHBA-së në dhjetor 2021 për shkak të dyshimeve për krim të organizuar dhe korrupsion.

Asetet e kompanisë janë gati 40 milionë euro

Millan Radoiçiç, së bashku me Zvonkon dhe Zharko Vesellinoviqin, zyrtarisht janë regjistruar me emrin e tij si pronar i një kompanie - "Inkop" nga Quprija në Serbinë qendrore.

"Inkop" si kompani amë, zotëron edhe katër kompani tjera që zhvillojnë aktiviteteve të ndryshme - nga ndërtimi, menaxhimi i hoteleve, deri te trafiku.

Pasuritë e paluajtshme dhe pajisjet e këtyre pesë kompanive kapin vlerën e së paku 38 milionë eurove, sipas raporteve financiare për vitin 2022, të disponueshme në faqen e internetit të Agjencisë për Regjistrat e Bizneseve të Serbisë (APR).

Ndërtimi i rrugëve është biznesi më fitimprurës

Ndër kompanitë e Radoiçiçit dhe vëllezërve Vesellinoviq, më fitimprurësja është "Inkop", makineritë e së cilës ndërtuan rrugë në disa lokacione në Serbi. “Inkop” fitoi rreth 17.4 milionë euro në vitin 2022.

Në atë kompani, Millan Radoiçiç dhe Zvonko Vesellinoviq kanë secili nga 40 për qind, ndërsa Zharko Vesellinoviq ka 20 për qind.

Sipas raporteve financiare të analizuara nga "REL"-i, pasuritë e paluajtshme dhe pajisjet e “Inkop”-it vitin e kaluar kapin vlerën e rreth 10 milionë eurove.

Ajo kompani së bashku me pronarët e saj është nën sanksionet e Shteteve të Bashkuara të Amerikës.

Por, meqenëse nuk janë të detyrueshme për Serbinë, “Inkop” funksionon pa pengesa.

Ndër projektet e hulumtuara më parë nga "REL"-i, dallohet ndërtimi i rrugës nga Pozharevaci në Golupec në lindje të Serbisë.

Aty, në shkurt të vitit 2022, shteti dha pëlqimin që kompania “Inkop” të ishte një nga nënkontraktorët e kompanisë kineze “Shandong”, për të cilën "REL"-i ka shkruar më parë. Punimet ende janë duke vazhduar.

Vila me pishinë pranë stadiumit të Zvezdës

Muret e larta, kamerat dhe rojet e sigurisë fshehin një vilë prej gati 500 metrash katrorë në një zonë elitare të Beogradit nga sytë e publikut.

Një vilë me pishinë dhe një truall me 15 ari pranë stadiumit të futbollit Crvena Zvezda janë në pronësi të kompanisë “Inkop”.

Çmimi mesatar për metër katror për shtëpitë në atë komunë të Beogradit është rreth katër mijë euro, bazuar në të dhënat e Agjencisë për patundshmëri për vitin 2023.

Kjo do të thotë se vila në pronësi të Radoiçiçit dhe vëllezërve Vesellinoviq do të kushtonte së paku dy milionë euro në treg.

Kontratë me shtetin pas sulmit në Banjskë

Tri ditë pas sulmit ndaj Policisë së Kosovës në Banjskë, kompania “Novi Pazar-put”, pronarët përfundimtarë të së cilës janë Millan Radoiçiç dhe vëllezërit Vesellinoviq, kanë marrë një punë nga shteti.

Kompania publike “Putevi Srbije”(Rrugët e Serbisë) më 27 shtator ia besoi asaj ndërmarrjeje ndërtimin e urës në Adrane afër Kralevës, me vlerë rreth një milion euro.

"REL"-i pyeti kompaninë publike “Putevi Srbije”pse ia besoi punën kompanisë “Novi Pazar-put” dhe nëse vendimi është rishqyrtuar pas sulmit të armatosur në Banjskë të organizuar nga Radoiçiqi. Ata u përgjigjën se Ligji për Prokurimin Publik “nuk parasheh rishikimin e vendimit për dhënie të kontratës” në atë rast.

Ata shprehen gjithashtu se “nuk ka rëndësi se kush është pronari i kompanisë që merr pjesë në prokurimet publike”.

“Novi Pazar-put” është në pronësi të “Inkop”-it, gjegjësisht Radoiçiçit dhe Vesellinoviqit, që nga janari i vitit 2020.

Edhe ajo kompani është nën sanksionet amerikane porse merr kontrata nga shteti i Serbisë./Radio Europa e Lirë

 





Lajmet e fundit nga