Kancelari Merz bën thirrje për ngrirjen e aseteve ruse

17 Dhjetor 2025, 21:45, Kosova & Bota CNA

Kancelari Merz mbështet ngrirjen 210 miliardë eurove e asete ruse për të ndihmuar për përfundimin e luftës në Ukrainë.

Në fjalimin që mbajti në Bundestagun gjerman lidhur me vitin 2025 Kancelari Friedrich Merz vështirë se kishte ndonjë lajm vërtet të mirë: gjeopolitikisht ka trazira të thella, deklaroi kreu i qeverisë. Marrëdhënia e Gjermanisë me SHBA-në ka ndryshuar rrënjësisht. Në Ukrainë vazhdon lufta e paligjshme agresore e Rusisë. Luftërat tregtare e rëndojnë ekonominë gjermane, e cila për shkak të "mosmarrjes së masave në të kaluarën" po has në vështirësi serioze edhe brenda vendit.

Pra të gjitha lajme të këqija. Shumë garanci dhe gjëra që konsideroheshin të sigurta nuk vlejnë më as në Gjermani. Kancelari Merz foli për një moment kthese dhe tha se rendi botëror që po zëvendësohet nga çrregullimi. Gjermania duhet t'u përgjigjet në mënyrë aktive të gjitha këtyre sfidave, tha Kancelari: "Ne nuk mund të rrimë duarkryq dhe të shikojmë ndërsa bota riorganizohet. Ne nuk jemi top loje i superfuqive."

Ukraina dhe asetet ruse

Kancelari e ka fjalën kryesisht për rolin e Gjermanisë në përpjekjet për paqe në Ukrainë. Sipas tij çështja është se si mund të arrihet një "paqe e drejtë". Ai inicioi së fundmi në Berlin një takim mes Presidentit ukrainas Volodymyr Zelenski dhe negociatorëve të Presidentit të SHBA-së Donald Trump për të diskutuar një plan paqeje.

Kancelari është përkrahës që asetet ruse të ngrira në bankat evropiane të përdoren për Ukrainën. "Me këtë i dërgojmë një sinjal të qartë Rusisë se ne do t'i përdorim asetet e depozituara këtu për të ndihmuar për përfundimin e kësaj lufte sa më shpejt të jetë e mundur."

Shumica e 27 qeverive të BE-së mbështesin përdorimin e afërsisht 210 miliardë eurove të aseteve ruse të bllokuara në BE për të ofruar gjatë viteve të ardhshme ndihmë financiare për Ukrainën si për të mbështetur rindërtimin e vendit edhe për blerjen e armëve moderne për ushtrinë ukrainase.

Por qeveritë e Hungarisë dhe të Sllovakisë kanë njoftuar se janë kundër ngrirjes së aseteve ruse dhe përdorimit të tyre për Ukrainën. Italia është gjithashtu skeptike. Rezerva të konsiderueshme ka edhe Belgjika, sepse në bankat e këtij vend të vogël gjenden një pjesë e madhe e fondeve nga Rusia. Jo pa arsye qeveria belge ka frikë, se mund të bëhet shënjestër e hakmarrjes ruse. Qeveria amerikane gjithashtu refuzon përdorimin e fondeve në formën e tyre aktuale.

AfD: "Kjo nuk është lufta jonë"

Partia më e madhe opozitare në Bundestag, Alternativa për Gjermaninë (AfD), parti pjesërisht ekstremiste e djathtë, është kundër. Kryetari i kësaj partie, Tino Chrupalla, tha pas fjalimit të Kancelarit se është kategorikisht kundër përdorimit të fondeve ruse. Ai tha se kishte deklaruar vite më parë se Ukraina nuk mund ta fitonte luftën: "Ajo nuk ishte dhe nuk është lufta jonë", tha Chrupalla.

Kancelari Merz është në pararojë të atyre që mbështesin përdorimin e fondeve ruse për Ukrainën. Tani do të shihet nëse Bruksel do të arrihet një shumicë për këtë. Përndryshe tetë muajt e tij të parë si Kancelar do të përfundojnë me një disfatë të madhe në fund të vitit./ DW