Parlamenti Europian kërkon fonde nga BE-ja për të financuar abortet jashtë vendit

17 Dhjetor 2025, 21:36, Kosova & Bota CNA

Parlamenti Europian kërkon fonde nga BE-ja për të financuar

Parlamenti Evropian ka miratuar një rezolutë jo-detyruese që kërkon krijimin e një fondi për të ndihmuar gratë që nuk kanë akses në aborte të sigurta në vendin e tyre.

Ky mekanizëm financiar, të cilin eurodeputetët e miratuan në një votim të mërkurën, do t'u mundësonte anëtarëve të BE-së të ofrojnë akses në ndërprerjen e shtatzënive për çdo grua që është e ndaluar ligjërisht ta bëjë këtë në vendin e saj të origjinës, siç është rasti në disa shtete të BE-së.

Do të ishte i hapur për të gjitha vendet e BE-së në baza vullnetare dhe i mbështetur nga fondet evropiane. Shtetet anëtare do të ofronin kujdes për abortin në përputhje me ligjet e tyre të brendshme.

Kërkesa trajton faktin se shumë gra në Evropë nuk kanë qasje të plotë në abort të sigurt dhe ligjor, sipas rezolutës.

Disa vende të BE-së kanë ligje shumë kufizuese mbi të drejtat e abortit. Një ndalim i plotë është në fuqi në Maltë, ku aborti nuk lejohet në asnjë rrethanë, ndërsa në Poloni lejohet vetëm kur ngjizja vjen pas dhunës seksuale ose kur ekziston rrezik për shëndetin e gruas.

Në janar të vitit 2021, Gjykata Kushtetuese Polake ndaloi abortet në rastet e keqformimeve të fetusit, të cilat deri atëherë kishin qenë arsyeja më e shpeshtë për ndërprerjen e shtatzënive në vend.

Vende të tjera kanë ligje më të zbutura, por atyre u mungon mbrojtje ligjore që dekriminalizon plotësisht abortin, disponueshmërinë e gjerë të shërbimit, mbulimin shëndetësor kombëtar ose informacionin e udhëhequr nga qeveria mbi këtë çështje.

Sipas Atlasit të Politikave Evropiane të Abortit 2025, disa vende të BE-së kanë ndërmarrë hapa për të garantuar të drejtën për aborte të sigurta. Franca, për shembull, e bëri atë një të drejtë kushtetuese, ndërsa Luksemburgu dhe Holanda kanë hequr periudhat e detyrueshme të pritjes.

Por shtete të tjera anëtare kanë regjistruar kufizime të reja, rritje të ngacmimit të ofruesve të shërbimeve të abortit dhe përhapjen e dezinformatave mbi këtë temë./ CNA