web counter
LEXO PA REKLAMA!

SHKARKO APP

App Store
Google Play

Guterres: Aneksimi i rajoneve të Ukrainës nga Rusia, përshkallëzimi i rrezikshëm

29 Shtator 2022, 22:03, Kosova & Bota CNA
Guterres: Aneksimi i rajoneve të Ukrainës nga Rusia,
Sekretari i Përgjithshëm i Kombeve të Bashkuara, Antonio Guterres, gjatë fjalimit të tij në selinë e OKB-së në Nju Jork.

Nëse Rusia ecën përpara me planet e saj për të aneksuar katër rajone të Ukrainës, kjo do të shënonte një "përshkallëzim të rrezikshëm" që do të kërcënonte perspektivat për paqen në rajon, tha të enjten shefi i OKB-së, Antonio Guterres.

"Çdo vendim për të vazhduar me aneksimin e rajoneve ukrainase: Luhansk, Donjeck, Herson dhe Zaporizhja nuk do të kishte asnjë vlerë ligjore dhe meriton të dënohet", u tha ai gazetarëve.

Kremlini njoftoi më 29 shtator se do t'i aneksojë formalisht katër rajone të Ukrainës, ku së voni u mbajtën të ashtuquajturat referendume për bashkim me Rusinë.

Zëdhënësi Dmitry Peskov tha se ceremonia e nënshkrimit do të mbahet më 30 shtator.

Në të, sipas tij, do të marrin pjesë presidenti rus, Vladimir Putin, dhe udhëheqësit e instaluar nga Moska të katër rajoneve ukrainase: Luhansk, Donjeck, Herson dhe Zaporizhja.

Zyrtarët pro-rusë të këtyre rajoneve thanë se votuesit e kanë mbështetur me shumicë votash bashkimin me Rusinë.

Por, referendumet e ashtuquajtura u hodhën poshtë nga Ukraina, qeveritë perëndimore dhe Kombet e Bashkuara, duke thënë se ato janë të paligjshme sipas ligjit ndërkombëtar.

Të katër rajonet formojnë një rrip të rëndësishëm tokësor midis Rusisë dhe Gadishullit të Krimesë, të cilin Moska e aneksoi ilegalisht nga Ukraina në vitin 2014./ REL





Lajmet e fundit nga