Gjykata e Apelit shpalli të paligjshme tarifat/ Trump, peticion Gjykatës Supreme

4 Shtator 2025, 07:37, Kosova & Bota CNA

Gjykata e Apelit shpalli të paligjshme tarifat/ Trump, peticion

Presidenti amerikan, Donald Trump, i ka kërkuar Gjykatës Supreme të SHBA-së të përmbysë vendimin e Gjykatës së Apelit, e cila vendosi që tarifat e vendosura ishin të paligjshme.

Në një peticion drejtuar Gjykatës së Lartë administrata u kërkoi gjyqtarëve të ndërhyjnë për të vendosur që presidenti ka fuqinë të vendosë taksa importi mbi vendet e huaja.

Gjykata e Apelit e SHBA-së, javën e kaluar vendosi 7-4 se tarifat e vendosura nga Trump janë kompetencë e Kongresit.

Në një postim të bërë disa ditë më parë Trump tha se tarifat janë për të ndihmuar prodhuesit, fermerët amerikanë dhe se më herët tarifat e vendosura nga vendet e tjera u lejuan të përdoreshin kundër SHBA-së nga politikanë të papërgjegjshëm referuar indirekt Biden.

"Të gjitha tarifat janë ende në fuqi!

Sot, një Gjykatë Apeli tha gabimisht se tarifat tona duhet të hiqen, por ata e dinë që Shtetet e Bashkuara të Amerikës do të fitojnë në fund.

Nëse këto Tarifa do të hiqen ndonjëherë, do të ishte një katastrofë totale për vendin. Do të na bënte të dobët financiarisht dhe ne duhet të jemi të fortë. SHBA-të nuk do të tolerojnë më deficite të mëdha tregtare dhe tarifa të padrejta dhe barriera tregtare jo-tarifore të vendosura nga vende të tjera, miq apo armiq, që dëmtojnë prodhuesit, fermerët dhe të gjithë të tjerët.

Nëse lihet në fuqi ky vendim do t'i shkatërrojë Shtetet e Bashkuara të Amerikës. Në fillim të kësaj fundjave, të gjithë duhet të kujtojmë se tarifat janë mjeti më i mirë për të ndihmuar punëtorët tanë dhe për të mbështetur kompanitë që prodhojnë produkte të shkëlqyera made in Amerika.

Për shumë vite, tarifat u lejuan të përdoren kundër nesh nga politikanët tanë të pakujdesshëm dhe të pamatur.

Me ndihmën e Gjykatës Supreme të Shteteve të Bashkuara, ne do t'i përdorim ato në dobi të kombit tonë dhe do ta bëjmë Amerikën përsëri të pasur, të fortë dhe të fuqishme! Faleminderit për vëmendjen tuaj ndaj kësaj çështjeje", shkroi Trump në Truth./CNA