Imamoglu para gjykatës për vendimin e paraburgimit/ Protesta mbështetëse dhe tensione politike në Turqi

22 Mars 2025, 21:09, Kosova & Bota CNA

Imamoglu para gjykatës për vendimin e paraburgimit/ Protesta
Kryetari i bashkisë së Stambollit, Ekrem Imamoglu, u dërgua këtë mbrëmje në gjykatë, katër ditë pas arrestimit të tij, ku pritet të vendoset nëse paraburgimi do të konfirmohet apo do të lirohet. Imamoglu, i cili mbërriti në Pallatin e Drejtësisë në Caglayan me një autokolonë prej 14 minibusësh, do të dëgjohet nga një ekip prej 34 prokurorësh, që janë angazhuar për hetimin e tij lidhur me akuzat për korrupsion dhe ryshfet.

Në deklaratën e tij para gjykatës, Imamoglu e quajti akuzën kundër tij të pabazuar dhe e përshkroi si një tentativë për të dëmtuar reputacionin e tij dhe besueshmërinë e tij politike. Ai shtoi se këto akuzat janë të fabrikuara dhe kanë qëllim të minojnë imazhin e tij publik. Ndërkohë, Pallati i Drejtësisë është rrethuar nga policia turke, me masa të forta sigurie dhe makinat ujë-hedhëse të pozicionuara për të parandaluar çdo incident.

Në këtë seancë, do të dëgjohen gjithashtu edhe dy kryetarë bashkish, përkatësisht të Sisli dhe Beylikduzu, të cilët janë të lidhur me Partinë Popullore Republikane (CHP), parti opozitare. Protestat mbështetëse për Imamoglu-n kanë shpërthyer në rrugët e Stambollit, me mijëra mbështetës që kërkojnë lirimin e tij dhe kundërshtojnë akuzat politike.

Përveçse për arrestimin e Imamoglu-t, protestuesit janë të shqetësuar për atë që e shohin si një tentativë të qeverisë për të minuar demokracinë dhe shtetin e së drejtës në Turqi. Prefektura e Stambollit ka shpallur masa të rrepta sigurie dhe ka ndaluar çdo tubim politik deri më 27 mars, duke e rritur tensionin në qytet.

Imamoglu, i cili është një nga rivalët më të fortë të presidentit turk Recep Tayyip Erdogan, ka ftuar mbështetësit e CHP-së të marrin pjesë në zgjedhjet paraprake të partisë, ku do të zgjidhet kandidati për president të vitit 2028. Ai ka theksuar se është e domosdoshme të mbrohen vlerat e republikës dhe demokracisë dhe ka kërkuar që të drejtat e qytetarëve të jenë të garantuara në një Turqi të drejtë.

Kjo situatë ka shkaktuar tensione të mëdha politike në Turqi, me Erdogan që ka akuzuar CHP-në për krijimin e kaosit dhe tensioneve në vend. Ai ka deklaruar se opozita po përpiqet të destabilizojë situatën, duke krijuar përplasje mes protestuesve dhe forcave të sigurisë. Protestat dhe zhvillimet e fundit pritet të kenë ndikim të mëtejshëm në skenën politike të Turqisë, veçanërisht me afro 5 javë deri në zgjedhjet paraprake të CHP-së./CNA