web counter
LEXO PA REKLAMA!

SHKARKO APP

App Store
Google Play

E fundit!

x

Kujdes! Stresi në punë mund t’ju shkatërrojë zemrën

2023-09-28 15:56:00, Blog CNA
Kujdes! Stresi në punë mund t’ju shkatërrojë
Foto ilustruese

Stresi, ndjenja e pakënaqësisë dhe mungesa e mirënjohjes: këto janë shenja që duhen pasur parasysh, sidomos nëse lidhen me mjedisin e punës, ku zakonisht kalojmë shumicën e ditëve.

Në këtë përfundim arrin një studim i kryer së fundmi në Kanada i publikuar në “Circulation: Cardiovascular Quality and Outcomes”, sipas të cilit meshkujt e ekspozuar ndaj një kombinimi faktorësh stresues në punë kanë një rrezik të dyfishtë për të zhvilluar sëmundje kardiovaskulare.

Ekipi i studiuesve, i udhëhequr nga Matilda Robisho e njësisë kërkimore të Shëndetit të Popullsisë dhe Praktikave Optimale të Shëndetit në Universitetin Laval në Kebek, Kanada, monitoruan 6.500 punonjës (3.118 meshkuj dhe 3.347 femra) për 18 vjet, nga viti 2000 deri në 2018-ën.

Në fillim të studimit, pjesëmarrësve iu kërkua të plotësonin një pyetësor vetë-vlerësimi me pyetje mbi nivelin e stresit të perceptuar në punë, ndjenjën e kontrollit mbi punën e tyre, dhe llojin e mirënjohjes apo shpërblimit të marrë. Asnjë nga pjesëmarrësit nuk kishte në fillim të studimit patologji që preknin sistemin kardiovaskular, dhe grupi përbëhej nga njerëz të moshës 18-65 vjeç me role të ndryshme profesionale dhe nivele të ndryshme arsimimi, të cilat varionin nga diploma e shkollës së mesme tek ajo e shkollës së lartë.

Të dhënat treguan se meshkuj që gjatë studimit raportuan një kombinim të niveleve të larta të stresit në punë dhe një ndjenje të çekuilibruar në marrëdhënien përpjekje-shpërblim, ishin 2-fish më të rrezikuar për të zhvilluar sëmundje të zemrës në krahasim me pjesëmarrësit që nuk e raportuan këtë lloj stresi.

Madje edhe burrat që i nënshtroheshin vetëm njërit prej dy faktorëve, ishin 49 për qind më të rrezikuar të prekeshin nga sëmundjet kardiovaskulare. “Stresi i punës i referohet mjediseve kur punonjësit përballen me një kombinim të kërkesave të larta për punë dhe nivelit të dobët të kontrollit mbi punën e tyre.

Kërkesat e larta mund të përfshijnë një ngarkesë të madhe pune, afate kohore të ngushta dhe përgjegjësi të shumta, ndërsa një kontrolli i ulët nënkupton se punonjësi ka pak zë në vendimmarrje dhe mbi mënyrën se si ta bëjë punën e tij”- shpjegon Robisho.

Sipas ekspertëve mungesa e ekuilibrit përpjekje-shpërblim, ndodh kur punonjësit investojnë shumë përpjekje në punën e tyre, ndërsa perceptojnë se shpërblimet që marrin në këmbim, si paga, mirënjohja apo siguria në punë janë të pamjaftueshme ose te padrejta në krahasim me përpjekjet.

Vetë studiuesit e pranojnë se studimi ka disa kufizime. Së pari sepse faktorët e stresit janë vlerësuar me një pyetësor të vetëm në fillim të studimit, ndaj nuk ka asnjë informacion në lidhje me efektin e tyre. Ndërkaq, në lidhje me sëmundjet e sistemit kardiovaskular, rezultatet e studimit rezultuan jo-përfundimtare në rastin e femrave.

“Paaftësia e studimit për të vendosur një lidhje të drejtpërdrejtë midis faktorëve psikosocialë të stresit të punës dhe sëmundjes koronare të zemrës tek gratë, tregon se nevojiten shqyrtime të mëtejshme në ndërveprimin kompleks midis faktorëve të ndryshëm të stresit dhe shëndetit kardiak të grave”- thotë Robisho./ Përshtatur në shqip nga CNA

 

 





Lajmet e fundit nga