Yield-et e bonove 12-mujore bien më tej në 2.54%

15 Tetor 2025, 22:50, Ekonomi CNA

Yield-et e bonove 12-mujore të thesarit pësuan një rënie të mëtejshme në ankandin e kësaj jave.

Sipas informacionit nga Banka e Shqipërisë, yield-i mesatar i ponderuar zbriti në 2.54%, nga 2.57% që kishte qenë në ankandin e mëparshëm, që ishte zhvilluar në muajin shtator.

Edhe ky ankand u karakterizua nga një kërkesë e lartë e investitorëve. Nga 7.8 miliardë lekë që kishte qenë shuma e shpallur për financim, kërkesa totale arritën në rreth 14.5 miliardë lekë.

Ministria e Financave vendosi ta rrisë shumën e emetimit në vlerën e pothuajse 9 miliardë lekëve. Pavarësisht kësaj, pro rata apo pjesa e pranuar e ofertave konkurruese rezultoi përsëri shumë e ulët, në nivelin 5.84%.

Nivelet e ulëta të yield-eve të bonove 12-mujore ndikojnë në uljen e kostos së borxhit të qeverisë, sidomos duke pasur parasysh se ato janë instrumenti më i përdorur i huamarrjes së brendshme.

Por, yield-et e bonove 12-mujore janë gjithashtu instrumenti kryesor benchmark për kreditimin në Lekë, një rënie e tyre reflektohet edhe në norma më të ulëta për kreditë me interesa të ndryshueshme në monedhën vendase.

Shifrat tregojnë se normat e ulëta të interesit vazhdojnë të mbështesin rritjen e kreditimit të ekonomisë. Për 8-mujorin 2025, kredia e re e dhënë nga sektori bankar arriti në 272.6 miliardë lekë kredi të reja, me një rritje prej 8% krahasuar me të njëjtën periudhë të vitit të kaluar.

Lidhur me ecurinë historike të yield-eve të bonove, duket se likuiditeti i lartë në treg i ka zbritur ato në nivelin më të ulët që prej qershorit të vitit 2022.

Madje, spread-i (marzhi mes yield-eve të bonove 12-mujore dhe normës bazë të interesit) ngelet shumë i ulët, me vetëm 0.04 pikë përqindje, ndërsa në disa momente gjatë këtij viti ky marzh ka qenë edhe negativ, çka nënkupton se yield-et e këtyre instrumenteve kanë rënë poshtë normës bazë. Bonot me afate më shkurtra maturimi, në emetimet e rralla që janë kryer gjatë këtij viti, kanë rezultuar gjithashtu rregullisht poshtë normës bazë të interesit.

Ndërkohë që yield-et e instrumenteve afatgjata pas tremujorit të tretë janë korrektuar në rënie, një gjë e tillë nuk ka ndodhur me yield-et e bonove, që vazhdojnë rënien. Kërkesa e lartë e investitorëve institucionalë, kryesisht bankave, në këtë segment të tregut vazhdon të ushtrojë një trysni drejt uljes së yield-eve.

Një ndikim në këtë drejtim ka ushtruar edhe ulja e vlerës së huamarrjes së qeverisë në tregun e brendshëm. Në tremujorin e tretë, vlera e huamarrjes së qeverisë parashikohej 10% më e ulët krahasuar me tremujorin e tretë të vitit të kaluar.

E njëjta tendencë pritet edhe në tremujorin e fundit të këtij viti. Sipas kalendarit të huamarrjes të Ministrisë së Financave, shuma e programuar për t’u financuar në tregun e brendshëm, (duke përfshirë edhe rifinancimet e instrumenteve të maturuara) do të ketë vlerën 64.9 miliardë lekëve, në rënie me 3.4% krahasuar me tremujorin e tretë dhe në rënie me 4.6% krahasuar me të njëjtën periudhë të një viti më parë./Monitor.al