OSSH 4.6 milionë euro investime në rrjet në zonën e Pogradecit si ndikim i turizmit

13 Tetor 2025, 17:48, Ekonomi CNA

OSSH 4.6 milionë euro investime në rrjet në zonën e

Turizmi duket se po detyron kompanitë publike që të shohin me prioritet disa rajone që kanë si pjesë të tyre këtë sektor. Pogradeci duket se është një prej tyre.

Drejtoria rajonale e OSSH në Korçë synon që përmes një tenderi me tre lote me një fond limit mbi 460 milionë lekë apo rreth 4.6 milionë euro të ndërhyjë për të përmirësuar rrjetin jo vetëm si nevojë e përmirësimit të tij për konsumatorët por edhe si efekt i zgjerimit që po sjell turizmi.

Konkretisht në relacionin teknik të kontratës me objekt “Zhvillimi i Rrjetit TM 20 kV, Kabina Elektrike, Rrjet TU me përcjellsa me vetmbajtje të tipit ABC Fiderat 2,3,4, 8, N/Stacioni Pogradec dhe ndërtimi i tubave dhe pusetave për daljet e fiderave 2,3,4,8” nënvizohen edhe disa nga detajet e kësaj ndërhyrje.

"Pogradeci dhe zonat periferike të tij karakterizohen nga një zhvillim intensiv i gjithanshëm si zonë turistike. Këta faktorë kanë bërë që ritmet e rritjes së kërkesës për energji elektrike të jenë mjaft të larta. Për zonën turistike duhet zhvilluar një infrastrukture elektrike e përshtatshme, që të garantojë një shërbim cilësor kundrejt konsumatorëve aktual dhe njëkohësisht të jetë në përputhje me zhvillimet e pritshme afatgjata të zonës.

Referuar strategjisë së zhvillimit dhe përmirësimit të rrjetave elektrike që kompania OSSH sh.a. ka, ndër të tjera dhe normalizimin e ngarkesave në linja TM, kabina transformacioni dhe rrjetin TU, dhe për t’ju përgjigjur zhvillimit urbanistik dhe demografik të zonës Pogradecit, është hartuar ky projekt me qëllim të furnizimit me energji elektrike të kësaj zone. Në Pogradec është ndërtuar N/Stacioni i ri 20/10kV, i cili është në fazë implementimi. Nga ky N/Stacion kanë dalë 10 fidera 20/0.4kV, të cilët janë ndërtuar në fazën e parë. Në fazën e parë janë ndërtuar fiderat 1, 5, 6, 7, 9 dhe 10. Kanë mbetur të ndërtohen fiderat 2, 3, 4 dhe 8” thuhet në relacion.

OSHEE Group po përmirëson rrjetin e shpërndarjes duke e fuqizuar njëkohësisht atë me një fokus të veçantë në zonat turistike edhe si një prioritet i shpallur nga qeveria por edhe rritjes së vëmendjes që të huajt po tregojnë ndaj Shqipërisë si destinacion vit pas viti./Monitor