Tarifa e re për pasagjerët, kompanitë e trageteve paralajmërojnë rritje çmimesh të biletave me 2 euro

28 Tetor 2025, 07:30, Ekonomi CNA

Tarifa e re për pasagjerët, kompanitë e trageteve

Nuk ka më dilemë që për çdo pasagjer që udhëton me kompanitë ujore, tokësore dhe ajrore, përfshirë edhe fluturimet me charter, për të cilët do të paguhet një tarifë prej 200 lekësh për pasagjer për transmetimin e të dhënave në Sektorin e Inteligjencës së Udhëtarëve (SIU) që do menaxhohet nga Drejtoria e Përgjithshme e Policisë, kostoja pritet të reflektohet me rritjen e çmimit të biletës të paktën me 2 euro.

Kompanitë e transportit të pasagjerëve me traget janë ndër të parët që paralajmërojnë se pritet ta përfshijnë koston e tarifës shtesë në çmimin e biletave për udhëtarët.

Sipas vlerësimeve, nisur nga numri hyrës dhe dalës i pasagjerëve, kostoja për kompanitë e transportit nga pagesa e tarifës, mund të arrijë në rreth 25 mln euro në vit vetëm për transportin ajror dhe detar.

Kostoja është llogaritur nga hyrjet dhe daljet e pasagjerëve për 2024, numri i të cilëve arrin në 12,3 mln udhëtarë. Këtu nuk llogariten hyrjet e daljet në sistemin tokësor përmes linjave të transportit ndërkombëtare të udhëtarëve.

Tarifa e re për pasagjerët, kompanitë do paguajnë mbi 25 mln euro në vit për sistemin e Policisë

Bernard Reso, drejtori i kompanisë së lundrimit “Adria Ferries”, pohon për Monitor që kjo është një tarifë e re, që nuk paguhet prej kompanive të transportit të pasagjerëve me tragete, pavarësisht se prej tyre të dhënat e pasagjerëve pas imbarkimit u transmetohen 5 autoriteteve shqiptare dhe atyre italiane. Reso paralajmëron që detyrimi për pagesën e tarifës për transmetimin e të dhënave do të rrisë me 2 euro çmimin e biletës së pasagjerëve.

“Kjo mund të konsiderohet “një taksë për policinë” e cila do të transferohet te çmimi i biletës së udhëtarëve. Çmimet e biletave nga kostoja e tarifës priten të rriten me 2 euro”.

Përfaqësuesi i kompanive të transportit të pasagjerëve me traget drejt Italisë përveçse ngre shqetësimin se nuk janë në dijeni të detyrimit për pagesën e tarifës prej 200 lekë për pasagjer, por theksojnë gjithashtu se nuk janë njoftuar edhe për mënyrën e ndryshimit të raportimit të të dhënave të pasagjerëve.

Ai sqaron se aktualisht të dhënat e pasagjerëve në formatin exel, pas imbarkimit u dorëzohen 5 autoriteve shqiptare, përfshirë Autoritetit Portual Durrës, Policisë së Kufirit, Doganave, Kapitenerisë së Porteve dhe AFTO-s (kompani që operon pranë terminalit të trageteve) dhe autoriteteve italiane. Të dhënat përmbajnë listën e plotë të pasagjerëve pas imbarkimit, përfshirë emër + mbiemër, gjinia, dita e lindjes, shtetësia, lloji i mjetit (nëse ka) dhe numri i platesë së mjetit. Transmetimi i të dhënave bëhet pa pagesë.

Kompania italiane “Adria Ferries” operon në Shqipëri me tragete për transportin e pasagjerëve prej 2004-s në linjat ndërkombëtare, Durrës- Ankona, Durrës- Bari dhe Durrës- Trieste.

Miratohet edhe rregullorja

Tarifa do të paguhet për transmetimin e të dhënave deri në 3 herë të pasagjerëve për një itinerar udhëtimi, drejt një njësie që quhet Sektori i Inteligjencës së Udhëtarit (SIU) dhe do të menaxhohet nga Drejtoria e Përgjithshme e Policisë.

Pas miratimit të vendimit për aplikimin e tarifës me vlerë 200 lekë për kompanitë e transportit, përfshirë linjat ajrore, detare dhe rrugor të transportit të pasagjerëve për transmetimin e të dhënave, është miratuar edhe vendimi me rregulloren “Për përpunimin e të dhënave të udhëtimit”

Rregullorja përcakton që nga mënyra se si do të funksionojë kjo njësi me personal me njohuri të avancuara në sistemet kompjuteri, të pajisur me certifikata “tepër sekret” deri te formatet dhe protokollet që do të zbatohen për transmetimin e të dhënave nga kompanitë drejt SIU.

Sipas rregullores, personeli i SIU-t do të përbëhet nga punonjës të kualifikuar të Policisë së Shtetit dhe të institucioneve të tjera operative, të pajisur me certifikatë sigurie “Tepër sekret” dhe me njohuri të avancuara në fushën e teknologjisë dhe analizës së të dhënave.

Njësia do të funksionojë 24 orë në ditë dhe do të ketë të drejtë të marrë, përpunojë dhe analizojë të dhënat që transportuesit dërgojnë për çdo pasagjer.

Rregullorja përcakton gjithashtu formatet dhe protokollet teknike të transferimit të të dhënave, që përfshijnë standarde ndërkombëtare si EDIFACT PNRGOV, XML PNRGOV, SFTP, HTTPS, dhe AS4, për të siguruar transmetim të sigurt dhe të saktë të informacionit.

Këto të dhëna do të dërgohen nga kompanitë 24 deri në 48 orë para nisjes së udhëtimit, më pas 60 dhe 180 minuta para nisjes, dhe në fund pasi të përfundojë imbarkimi, në mënyrë që sistemi të ketë të gjitha informacionet për pasagjerët që hyjnë dhe dalin nga territori shqiptar.

Më herët Ministria e Brendshme sqaroi për Monitor se SIU është ngritur për të rritur sigurinë kombëtare, për të parandaluar dhe zbuluar veprimtari kriminale ndërkombëtare, si dhe për të identifikuar rreziqe të mundshme ndaj sigurisë kufitare të vendit./ Monitor