web counter
LEXO PA REKLAMA!

SHKARKO APP

App Store
Google Play

E fundit!

x

Frenohet rritja e dëmeve nga aksidentet për kompanitë e sigurimeve

22 Tetor 2025, 07:20, Ekonomi CNA

Frenohet rritja e dëmeve nga aksidentet për kompanitë e

Dëmet e paguara nga kompanitë për sigurimin e aksidenteve po rriten me ritme më të ngadalta gjatë këtij viti. Sipas të dhënave nga Autoriteti i Mbikëqyrjes Financiare (AMF), për tetë muajt e parë të vitit kompanitë e sigurimit të jo-jetës kanë paguar 3.55 miliardë lekë dëme në klasat e përgjegjësive motorike ndaj palëve të treta.

Krahasuar me të njëjtën periudhë të një viti më parë, dëmet në sigurimet e detyrueshme motorike janë rritur me 0.55%. Një vit më parë, rritja e dëmeve kishte qenë 36%.

Efektin kryesor në frenimin e rritjes së shpenzimeve për dëme e ka dhënë Kartoni Jeshil. Shpenzimet për dëmet e shkaktuara nga mjetet shqiptare jashtë vendit për tetë muajt e parë të vitit kanë rënë me 31.3% krahasuar me të njëjtën periudhë të një viti më parë.

Megjithatë, dëmet e lidhura me sigurimin e brendshëm TPL kanë vazhduar rritjen, me 9.3% më shumë krahasuar me 8-mujorin 2024.

Dëmet për sigurimet e detyrueshme motorike vazhdojnë të dominojnë dukshëm strukturën e dëmeve në sigurime. Këtë vit, ato përbëjnë këtë vit më shumë se 71% të totalit të dëmeve të paguara nga kompanitë e sigurimit të jo-jetës në Shqipëri. Pesha e dëmeve në sigurimet TPL është rritur me një pikë përqindjeje gjatë këtij viti.

Në rënie paraqitet edhe vlera e dëmeve që janë objekt i Fondit të Kompensimit të Byrosë Shqiptare të Sigurimeve. Për 8-mujorin, dëmet e paguara në këtë kategori kanë rënë me 31.7% krahasuar me një vit më parë.

Fondi i Kompensimit të Byrosë Shqiptare të Sigurimeve ka për detyrë ligjore pagesën e dëmeve të shkaktuara nga mjetet e pasiguruara dhe të paidentifikuara. Më pas, Fondi ka të drejtë të ngrejë padi regresi ndaj shkaktarit të dëmit në gjykatë dhe të marrë mbrapsht shumën e paguar.

Që nga fillimi i këtij viti, kompanitë e sigurimit kanë nisur aplikimin e primeve të diferencuara të rrezikut për sigurimin e brendshëm TPL, për përgjegjësitë ndaj palëve të treta.

Faktorët ku bazohet diferencimi i primit jenë fuqia motorike e mjeteve (sa më i lartë kubikazhi i mjetit, aq më i lartë primi i sigurimit; mosha e drejtuesit (prim më i lartë për moshat më të reja, deri në 21 vjeç); pronësia e mjetit (në varësi të faktit nëse është në pronësi të një individi apo subjekti, ku mjeti mund të përdoret nga disa drejtues); qarku i regjistrimit të mjetit qarqet me numrin më të madh të dëmeve do të kenë koeficient rreziku më të lartë dhe vjetërisa e mjetit (mjetet më të vjetra kanë prim të lartë).

Duke filluar nga viti i ardhshëm, pritet që të fillojë edhe aplikimi i parimit bonus-malus, që do të sjellë çmime më të larta për drejtuesit e mjeteve që shkaktojnë dëme./Monitor.al





Lajmet e fundit nga