E fundit!

11:58 Aktualitet

ABI Bank ka refuzuar të paguajë gjobën 120 milionë për një portal gjobaxhi

ABI Bank ka refuzuar të paguajë gjobën 120 milionë për një...

Shqetësime për sistemet bankare në mbarë globin

23 Mars 2023, 15:50, Ekonomi CNA

Shqetësimet rreth falimentimeve të fundit të bankave dhe paketat e ndihmave, po përhapen në ekonomitë botërore, nga Nju Jorku në Pekin, ndërsa bankierët qendrorë po punojnë për të qetësuar depozituesit dhe tregjet financiare.

Korrespondenti i "Zërit të Amerikës", Mike O-Sullivan njofton nga Kalifornia, ku një bankë e rëndësishme për sektorin e teknologjisë, banka Silicon Valley, falimentoi në fillim të muajit.

Sekretarja amerikane e Thesarit, Janet Yellen tha këtë javë se sistemi bankar është në gjendje të mirë.

Garancitë e zonjës Yellen dhe zyrtarëve të tjerë vijnë mes rënies së çmimit të aksioneve të bankës First Republic me seli në San Francisco dhe falimentimit të bankës Signature, një kompani e rëndësishme në tregun e kriptomonedhave.

Administrata e Presidentit Biden u doli në mbrojtje depozituesve në bankat Signature dhe Silicon Valley, një financuese e madhe e bizneseve të reja teknologjike që gjithashtu falimentoi këtë muaj.

Presidentja e Bankës Qendrore Europiane, Christine Lagarde, u përpoq të zbusë tensionet në Bruksel, pas njoftimeve të zyrtarëve zviceranë për marrëveshjen e bankës UBS për të blerë bankën globale të investimeve dhe kompaninë e shërbimeve financiare, e cila ndodhet në vështirësi, Credit Suisse.

“Kemi shumë besim se kapitali dhe likuiditeti i bankave të eurozonës janë në pozitë të kënaqshme”, tha zonja Lagarde.

Investitorët aziatikë ishin të shqetësuar, përfshirë ata në Shangai, ndërsa zyrtarët kinezë këmbëngulën se sipërmarrja e përbashkët me bankën Silicon Vlley është e qëndrueshme.

Senatori amerikan, Marco Rubio, kërkoi rishikimin e zotërimeve kineze të bankës, për t’u siguruar se firmat amerikane që punojnë me teknologji të ndjeshme, nuk janë blerë nga interesat kineze.

Qeveria amerikane veproi për ta penguar përhapjen e asaj që ekonomistët e shohin si një sëmundje ngjitëse, thotë ekspertja financiare Diane Ellis.

“Kjo mund të ndodhë kur një bankë falimenton dhe dështimi i saj shkakton dështimin e një banke, institucioni tjetër financiar ose bizneseve të tjera, duke shkaktuar dëme të konsiderueshme në ekonominë reale”, thotë zonja Ellis.

Të gjitha këto përpjekje kanë për qëllim shmangien e përsëritjes së goditjes që tregu i pasurive të patundshme pësoi në vitin 2008, duke shkaktuar dështimin e qindra bankave dhe duke zhytur botën në recesion./ VOA