E fundit!

07:28 Aktualitet

Shteti duhet të paguajë 180 milionë euro për arbitrazhet ndërkombëtare

Detyrimet që lidhen me vendimet e arbitrazheve ndërkombëta...

Raporti i "Standard&Poor's" për Shqipërinë: Stabilitet makroekonomik, pritet rritje prej 3.5%

20 Shtator 2025, 17:34, Ekonomi CNA

Raporti i "Standard&Poor's" për Shqipërinë:

Agjencia e vlerësimit të kreditit “Standard & Poor’s Global Ratings” ka rikonfirmuar vlerësimin afatgjatë të kreditit sovran të Shqipërisë në nivelin “BB”, duke ruajtur njëkohësisht perspektivën “të qëndrueshme”.

Në njoftimin e Ministrisë së Financave theksohet se ky vendim pasqyron besimin e fortë të agjencisë në stabilitetin makroekonomik të vendit dhe qëndrueshmërinë e tij përballë sfidave globale.

Sipas raportit të S&P, disiplina fiskale dhe rezervat e forta valutore mbeten shtyllat kryesore që mbështesin stabilitetin ekonomik. Agjencia vlerëson gjithashtu se rritja ekonomike e Shqipërisë do të jetë e qëndrueshme, e nxitur nga investimet private, konsumi i brendshëm dhe procesi i anëtarësimit në BE.

Parashikimet ekonomike

• PBB reale pritet të zgjerohet me 3.6% në vitin 2025, kryesisht nga rritja e pagave reale dhe shpenzimet e familjeve.
• Turizmi do të mbetet një sektor kyç, edhe pse me një ritëm më të moderuar për shkak të maturimit të tregut.
• Për periudhën 2026-2028, S&P parashikon një rritje mesatare prej 3.5% në vit.

Financat publike

Agjencia parashikon që deficiti buxhetor të mbahet në një nivel mesatar prej 2% të PBB-së deri në vitin 2028, ndërsa borxhi publik të ulet gradualisht në rreth 51% të PBB-së në fund të periudhës. Kjo pritet të arrihet përmes një politike fiskale të kujdesshme pas zgjedhjeve parlamentare.

Integrimi në BE

Një element pozitiv është përshpejtimi i negociatave të anëtarësimit, ku Shqipëria ka hapur tashmë 24 nga 33 kapituj, përfshirë klasterin e Konkurrencës dhe Rritjes Gjithëpërfshirëse. Ndërkohë, Komisioni Evropian ka miratuar një paketë prej 920 milionë eurosh financim potencial për Shqipërinë, pjesë e Planit të Rritjes për Ballkanin Perëndimor.

Rezervat valutore

S&P evidenton se rezervat valutore të vendit kanë arritur në 7.8 miliardë dollarë deri në mesin e vitit 2025, falë blerjeve neto nga Banka e Shqipërisë dhe emetimit të fundit të Eurobondit. Këto rezerva sigurojnë një “mburojë të rëndësishme kundër goditjeve të jashtme”./CNA