Matjet e Eurostat, inflacioni i gushtit 2.3%, ushqimet dominojnë rritjen

17 Shtator 2025, 18:58, Ekonomi CNA

I matur me metodologjinë e Eurostat Indeksi i Harmonizuar i Çmimeve të Konsumit në muajin Gusht 2025 u rrit me 2,3 %.

Rritja më e madhe e çmimeve prej 9,9 % vërehet në grupin “Argëtim dhe kulturë”, pasuar nga grupet “Hotele, kafene dhe restorante” me 3,6 %, “Pije alkoolike dhe duhan” me 3,3 %, “Mobilim, pajisje shtëpie dhe mirëmbajtje” me 2,7 %. Grupi “Ushqime dhe pije joalkoolike” u rrit me 1,7 %, “Mallra dhe shërbime të ndryshme” me 1,6 %, “Komunikimi” me 1,1 %, “Shëndeti” dhe “Shërbimi arsimor” me 1,0 % secili, “Qira, ujë, lëndë djegëse dhe energji” me 0,6 %, “Veshje dhe këpucë” me 0,4 %. Nga ana tjetër, çmimet e grupit “Transporti” u ulën me 0,7 %.

Në muajin Gusht 2025, ndryshimi mujor i matur nga Indeksi i Harmonizuar i Çmimeve të Konsumit është +0,2 %. Ky ndryshim është ndikuar kryesisht nga rritja e çmimeve të grupit “Veshje dhe këpucë” me 0,6 %, pasuar nga grupet “Pije alkoolike dhe duhan” dhe “Qira, ujë, lëndë djegëse dhe energji” me 0,5 % secili, “Mobilim, pajisje shtëpie dhe mirëmbajtje” dhe “Hotele, kafene dhe restorante” me 0,4 % secili, “Mallra dhe shërbime të ndryshme” me 0,2 %, “Ushqime dhe pije joalkoolike”, “Shëndeti”, “Komunikimi” dhe “Argëtim dhe kulturë” me 0,1 % secili. Nga ana tjetër, çmimet e grupit “Transporti” u ulën me 0,2 %.

Çmimet e konsumit vijojnë të shfaqin dallime të mëdha mes vendeve të Bashkimit Europian. Sipas të dhënave të fundit për gushtin 2025, Rumania kryeson listën me një normë vjetore inflacioni prej mbi 8%, e ndjekur nga Estonia dhe Kroacia me nivele mbi 5–6%. Edhe Sllovakia, Hungaria dhe Letonia regjistrojnë rritje të ndjeshme të indeksit të çmimeve të konsumit, që variojnë nga 4 deri në 5%.

Në anën tjetër të spektrit, disa nga ekonomitë më të mëdha europiane po shfaqin rritje të ngadaltë të çmimeve. Zvicra, Çekia dhe Franca regjistrojnë nivele nën 2%, ndërsa Italia, Holanda dhe Irlanda shfaqin norma rreth këtij kufiri. Këto shifra tregojnë një përmirësim të dukshëm në kontrollin e inflacionit, sidomos krahasuar me pikat më të larta të dy viteve të fundit.

Në total, inflacioni mesatar i vendeve të BE-së arriti në 2.4%, duke u mbajtur pranë objektivit të vendosur nga Banka Qendrore Europiane./Monitor.al