Berisha, kundër nismës së tij/ Pas 11 vitesh kundërshton amnistinë fiskale

15 Korrik 2022, 12:32, Ekonomi CNA
Berisha, kundër nismës së tij/ Pas 11 vitesh kundërshton
Kreu i PD-së, Sali Berisha

Kreu i PD-së, Sali Berisha, ka ripërsëritur qëndrimin kundër amnistisë fiskale.

Sipas Berishës amnistia fiskale bëhet me qëllim që të legalizohen paratë e drogës dhe krimit dhe një nismë e tillë do të godasë rëndë biznesin.

“Paralajmëroj qeverinë se amnistia fiskale është një goditje shumë e rëndë për bizneset e ndershme, për reputacionin e vendit dhe për rendin e sigurinë. Nëse siç ka qëllim kryesor të legalizohen paratë e krimit, pasi ju e keni të qartë se nuk ka shqiptarë të ndershëm, i cili me punën e ndershme shtesë qoftë edhe të paregjistruar të mund të sigurojë 2 milionë euro kursime. Ka pra vetëm një synim që çunat të legalizojnë paratë e krimit dhe ne jemi kategorikisht kundër saj.

Me këtë proces, nuk ka diskutim se Edi Rama dhe grupi i tij do të kenë një taksë veç asaj që kanë shpallur për shumat që do të legalizohen. Mbi të gjitha ky është një shpërblim që njerëzit që merren me trafiqe nuk e meritojnë kurrë. Njerëzve të ndershëm ua u rrit taksat, ua u çon 123% këtyre që merren me aktivitete kriminale  thotë e keni 7%”, është shprehur Berisha gjatë një konference për mediat.

Kujtojmë se amnistia fiskale ka qenë një nismë e PD-së në vitin 2011, kohë kur ishte në pushtet dhe është bërë publike nga Sali Berisha, i cili ishte kryeministër.

Deklarata e Berishës në vitin 2011, si kryeministër

Është një proces që e kemi nisur disa muaj më parë dhe vende të mëdha si SHBA apo vende të tjera, aplikojnë amnistinë fiskale. Kam shumë kënaqësi që ne të aplikojmë amnistinë fiskale për të gjitha bizneset me përjashtim të atyre të lidhura me pushtetarë apo ish-pushtetarë. Këto biznese nuk do të përfshihen në amnisti.

Ministria e Financave do bëjë kujdes të madh që në projekligjin që do i dërgojë sa më shpejt parlamentit, të parandalohet mundësia e amnistimit të trafiqeve, të drogës, parave të cilat janë me origjinë jobiznesi.

Amnistia kërkon 3/5 si kusht për t’u votuar. Në këtë kontekst unë ftoj opozitën të shqyrtojë projektin e qeverisë, të amendojë këtë projekt mbi bazën e platformës që ka dhe ta votojë. Duke ditur qëllimet konstante obstruksioniste të mbajtura prej saj, ne duhet të përgatitemi në dy variante, varianti i amnistisë dhe faljes. Falja do të jetë për të gjitha detyrimet, gjobat dhe detyrimet e prapambetura. Falja duhet të jetë një shans i ri për të gjitha bizneset dhe në deklarimin e punëtorëve që kanë në mënyrë që të krijohet një mundësi e re për një formalizim më të madh.

Do doja që kjo të orientohej për biznesin e vogël. Nuk e bëj këtë për politikë, por 80% e të punësuarve në këtë vend janë në këtë biznes. Ky është edhe gjeneratori kryesor i punësimit./CNA.al

Lajmet e fundit nga