web counter
LEXO PA REKLAMA!

SHKARKO APP

App Store
Google Play

E fundit!

x

Ari bie në nivelin më të ulët në gjashtë muaj, ndikim nga çmimet e naftës

11 Qershor 2026, 20:47, Ekonomi CNA

Ari bie në nivelin më të ulët në gjashtë muaj,

Çmimi i arit ra në nivelin më të ulët në më shumë se gjashtë muaj, ndërsa investitorët spekulativë po tërhiqen nga tregu dhe pritshmëritë për norma më të larta interesi në SHBA po reduktojnë tërheqjen e metalit të çmuar si aktiv strehë.

Ari zbriti deri në 4,022 dollarë për onz troi, duke shënuar nivelin më të ulët që nga fundi i vitit të kaluar. Që nga kulmi i arritur në janar, çmimi i metalit të çmuar ka humbur më shumë se 20%, duke regjistruar një nga performancat më të dobëta tremujore në gati një dekadë.

Rënia lidhet me disa faktorë njëkohësisht. Rritja e çmimeve të naftës, e nxitur nga tensionet në Lindjen e Mesme, ka shtuar frikën për inflacion më të lartë dhe ka forcuar pritshmëritë se Rezerva

Federale e SHBA-së mund të mbajë normat e interesit të larta për më gjatë, madje edhe t’i rrisë ato deri në fund të vitit. Për një aktiv që nuk gjeneron interes, si ari, normat më të larta e bëjnë investimin më pak tërheqës.

Një tjetër faktor është largimi i kapitalit spekulativ. Fondet dhe investitorët që kishin hyrë në treg gjatë periudhës së rritjes së fortë të çmimit po mbyllin pozicionet e tyre. Vetëm gjatë periudhës mars-maj, fondet e investimit të lidhura me arin regjistruan dalje neto prej rreth 55 tonësh, ndërsa interesi i investitorëve me pakicë është zbehur ndjeshëm.

Sipas analistëve, një pjesë e kapitalit po zhvendoset drejt aktiveve që ofrojnë kthime më të larta, si obligacionet qeveritare, ndërsa interes po tërheqin edhe ofertat e pritshme publike të kompanive të teknologjisë, përfshirë IPO-n e shumëpritur të SpaceX.

Megjithatë, jo të gjithë janë pesimistë për perspektivën afatgjatë të metalit të çmuar. Bankat qendrore vazhdojnë të mbeten blerëse neto të arit dhe ky faktor pritet të ofrojë mbështetje për tregun, edhe pse në afat të shkurtër çmimet mund të mbeten nën presion.

Sipas Reuters, ari rikuperoi një pjesë të humbjeve gjatë sesionit të fundit tregtar, duke u ngjitur me 0.6% në rreth 4,097 dollarë për onz, por analistët paralajmërojnë se pa një ndryshim në pritshmëritë për normat e interesit, presioni mbi çmimin mund të vazhdojë./Financial Times 





Lajmet e fundit nga