LEXO PA REKLAMA!

SHKARKO APP

Ku e harroi qeveria amnistinë e madhe fiskale?

29 Nëntor 2023, 16:19, Editorial CNA
Ku e harroi qeveria amnistinë e madhe fiskale?
Kryeministri Edi Rama

Kryeministri Edi Rama, në të paktën dy raste, ka marrë angazhim publik se në Shqipëri do të kishte një amnisti fiskale, e cila e vërtetë dhe e plotë në 33 vite demokraci nuk ka ndodhur kurrë.

Kryeministri kërkoi dhe deklaroi publikisht se do të bënte një amnisti të plotë, por në të dyja rastet është tërhequr pas ndërhyrjes së fortë ndërkombëtare.

Theksojmë se gjithçka shkruhet ka lidhje me një amnisti që ndihmon, i jep frymë dhe oksigjen biznesit dhe jo një amnisti për krimin dhe asetet e botës së krimit.

Gjithmonë për një amnisti, e cila ndihmon dhe shëndosh biznesin, i sjell më shumë të ardhura shtetit në buxhet dhe bën më të mirë tregun, më të vërtetë, pa fshehje të ardhurash dhe manipulim. Pra gjithmonë për një amnisti që ndihmon ekonominë e vendit dhe biznesin dhe jo për një amnisti që ndihmon krimin dhe botën e tij.

Në vitin 2011, në atë kohë në opozitë, Rama e kundërshtonte amnistinë, megjithëse kishte të gjitha mundësitë që të përfshihej tek ajo dhe atëherë përdori këshillin e Qarkut të Fierit, ashtu sikundër e përdori edhe për të bllokuar hapat e Shqipërisë drejt rrugës së Bashkimit Evropian, për të mos votuar amnistinë fiskale.

Në atë kohë u zgjodh që të bëhej një falje borxhesh shlyerje detyrimesh të regjistrave të vjetër, por u gjetën edhe formulat e rivlerësimit të pasurive për t’i futur ato më shumë në treg.

Kryeministri Edi Rama premtoi se do të bënte një falje të madhe fiskale, ndoshta jo një fshirje detyrimesh, siç kishte ndodhur në vitin 2011, por do të bënte një amnisti të madhe fiskale, më të plotë, kjo duke qenë mjaft të kujdesshëm, duke përfshirë pasuritë e emigrantëve dhe investimet e tyre në vend.

Rama argumentoi publikisht se amnistia do të formalizonte të ardhurat e shqiptarëve që punojnë nëpër botë, pa kërkuar burimin e tyre, por si përfundim amnistia nuk ndodhi kurrë.

Ky është rasti klasik kur kryeministri ynë ka dështuar, i cili ka premtuar amnisti me shpresën se do të çliroheshin me qindra miliona euro në biznese, bilancet e dyfishta, të ardhurat e fshehura e të tjera si këto, por kjo nuk ndodhi.

Nga ana tjetër, në Tiranë, në të gjithë Shqipërinë bizneset vazhdojnë të jenë në të njëjtën situatë, kullat vazhdojnë të ngrihen, investimet të vijojnë, emigrantët të jenë në të njëjtën situatë, bizneset të kenë të njëjtat problematika dhe ajo që mund t’i jepte zgjidhje, amnistia, nuk ndodhi.

Me shumë gjasa amnistia u harrua dhe gjasat janë se nuk ka për të ndodhur, pasi kryeministri ka bërë një hap prapa pas ndërhyrjes së fortë të ndërkombëtarëve, të cilët mesa duket nuk e lejuan.

Pra, ishin këta të fundit që i thanë stop Edi Ramës për një amnisti të plotë fiskale në Shqipëri./ CNA

Lajmet e fundit nga