Skandal me Orkestrën Simfonike në Shkodër/ Përzgjedhjet bëhen pa asnjë kriter profesional

11 Mars 2025, 14:09, Denoncim CNA

Skandal me Orkestrën Simfonike në Shkodër/ Përzgjedhjet

E rithemeluar pas 32 vitesh, në janar të vitit 2023 me një akt të paprecedent sot Orkestra Simfonike e Shkodrës kthehet në një formacion që nuk është as mish, as peshk, as ansambël dhome, as orkestër. E gjitha kjo me vendime personale të Drejtorisë së Kulturës të Benet Becit. Deklarata për këtë skandal u bë nga njësia e PD-së në Shkodër, nga zëdhënësja Elida Lici.

Në datën 15 janar 2025, në faqen zyrtare të Bashkisë Shkodër u shpallën pa asnjë paralajmërim, pa asnjë rregullore, pa asnjë kriter të qartë profesional, audicionet për 51 instrumentistë, të cilat u zhvilluan jashtë çdo kriteri kohor për të tilla konkurse në datat 20 dhe 21 janar në ambientet e Teatrit “Migjeni”, ku për show-n e radhës ishte prezent edhe vetë Benet Beci dhe drejtori i transportuar i kulturës Pandi Laço, të cilët e quajtën edhe si një arritje dhe pjesëmarrje bombastike!

Por tullumbacja e propagandës u shpua shumë shpejt!

Po në faqen zyrtare, në këtë shpallje absurde për një orkestër funksionale, e cila ka shkëlqyer gjatë këtyre dy viteve në koncerte kombëtare e ndërkombëtare, parashikohej shpallja e fituesve brenda 5 ditësh sipas ligjit.

Fituesit nuk u shpallën kurrë, rezultatet e jurisë nuk u deklaruan dhe administrata e Benetit ka disa ditë, në kundërshtim me çdo normë ligjore, që thërret sipas “simpative” personale në telefona privatë instrumentistë për lidhjen e kontratës!

Në këtë listë të fshehtë Benet Beci dhe administrata e tij kanë parashikuar vetëm gjysmën e kontratave për instrumentët e orkestrës simfonike, nga 51 që janë miratuar nga Këshilli Bashkiak, duke e çuar në dekadencën e një ansambli të pakuptimtë muzikor, orkestrën simfonike të Shkodrës./CNA