Shkeljet e Arben Rakipit/ Studio ligjore e tij, përfaqëson Veliajn përballë SPAK-ut

8 Janar 2025, 22:34, Denoncim CNA

Shkeljet e Arben Rakipit/ Studio ligjore e tij, përfaqëson Veliajn

Erion Veliaj dhe Arben Rakipi

Arben Rakipi drejton Shkollën e Magjistraturës në shkelje të hapur të ligjit për konfliktin e interesit.

Emisioni investigativ Plug denoncoi të dhëna që tregojnë se Arben Rakipi, edhe pse nuk i lejohet të ushtrojë biznes privat, ai dhe familjarët e tij themeluan në vitin 2020 një studio ligjore.

Studio “Rakipi & Partners”, rezulton se është përfaqësuesja ligjore e Erion Veliajt kundër SPAK. Më herët emisioni Plug ka denoncuar faktin se Arben Rakipi ka qenë i angazhuar profesionalisht në OJF-t e Ajola Xoxës, duke treguar kapjen korruptive të sistemit të drejtësisë. Jo vetëm kaq, por Arben Rakipi e ka kthyer shkollën e magjistraturës çerdhe punësimesh për familjarët e tij.

Emisioni investigativ Plug në Syri Televizion, denoncoi një tjetër skandal që lidhet me drejtorin e Shkollës së Magjistraturës, Arben Rakipi. Ish-gjykatësi i periudhës së diktaturës, që mbajti postin e Prokurorit të Përgjithshëm të vendit në vitet 1997-2002, i akuzuar nga Partia Demokratike si shërbëtor i socialistëve, sot drejton në shkelje të plotë të ligjit, Shkollën e Magjistraturës, institucionin e vetëm në vend që prodhon prokurorët dhe gjykatësit që duhet të hetojnë krimin e organizuar apo korrupsionin e zyrtarëve të lartë.

Sipas rregullores së Shkollës së Magjistraturës, hartuar nga vetë Arben Rakipi, dhe ligjeve përkatëse, drejtorit të kësaj shkolle nuk i lejohet të kryejë biznes privat. Por Arben Rakipi së bashku me bashkëshorten dhe djalin e tij janë themelues dhe pronar të studios ligjore “Rakipi & Partners”, e themeluar në vitin 2020, periudhë kur Arben Rakipi drejtonte gjithashtu shkollën e Magjistraturës. Shkelja e ligjit dhe rregullores së shkollës së magjistraturës nga Arben Rakipi për konfliktin e interesit nuk janë i vetmi skandal.

Studio ligjore e familjes Rakipi, rezulton se është përfaqësues ligjor i Erion Veliajt, përballë prokurorëve të SPAK që prej muajsh janë duke e hetuar familjarisht për katër vepra penale.

Kjo marrëdhënie nuk është e rastësishme, ku studio ligjore e drejtorit të shkollës së Magjistraturës, ofron mbrojtjen e kryebashkiakut të Tiranës. Emisioni Plug ka denoncuar më herët, se Arben Rakipi ka qenë i angazhuar profesionalisht në OJF-t e Ajola Xoxës për reformën në drejtësi.

Por jo vetëm qëndrimi në detyrë në kushtet e konfliktit të interesit dhe në shkelje të hapur të ligjit, por Arben Rakipi e ka kthyer shkollën e Magjistraturës në institucion për punësimin e familjarëve të tij.

Sipas verifikimeve dhe denoncimeve në media, Arben Rakipi ka punësuar në shkollën e magjistraturës bashkëshoren dhe motrën e tij, ku njëra është pedagoge dhe eksperte dhe tjetra shefe departamenti.

Në studion e Arben Rakipit është aksioner dhe ish-prokurori Ermir Beta, i cili dha dorëheqjen nga detyra për t'i shpëtuar vettingut, si dhe Romina Zano, një juriste e cila ka qenë e angazhuar profesionalisht në Fondacionin Shoqëria e Hapur të George Soros.

Pra si në çdo rast, pas çdo drejtuesi të Drejtësisë së re na del financimi i Xhorxh Soros, nëpërmjet Erjon Veliajt dhe Ajola Xoxës. Më pas hartojmë ligje sipas oreksit, i firmosim e në fund nuk i zbatojmë as vetë, e kur abuzimet bëhen mullar, sërish mbrojmë njeri-tjetrin./SyriTv