web counter
LEXO PA REKLAMA!

SHKARKO APP

App Store
Google Play

E fundit!

x

Pa çati e suva, digjet fondi i restaurimit të shtëpisë së Pashko Vasës

10 Shkurt 2023, 21:51, Denoncim CNA
Pa çati e suva, digjet fondi i restaurimit të shtëpisë
Foto ilustruese

Disa herë emisioni investigativ “Stop” ka transmetuar problematikën e shtëpisë së Pashko Vasës, e cila megjithëse monument kulture po rrënohet.

Trashëgimtarja Rajmonda Vasa tha se dikur priste e përcillte miq e vizitorë të shtëpisë së patriotit, por sot shtëpisë i pikon çatia dhe i ka rënë suvaja.

Rajmonda Vasa: Unë ju kam shqetësuar për problemet që ka filluar të ketë kjo banesë dhe që është lënë në harresë nga institucionet. Janë problemet që janë krijuar kohët e fundit nga punët jo cilësore. Nuk shoh asnjë përgjigje. Është krijuar lagështirë sepse ka pikuar çatia. Unë ju kam dërguar disa foto që të ngre alarmin se kjo po shembet.

Restaurimet e bëra në vitin 2012 dhe 2018 kanë qenë me defekte, dhe e kanë kthyer banesën në rrënojë. Rajmonda ka vënë në dijeni Ministren e Kulturës dhe Kryeministrin, por nuk ka marrë përgjigje.

Arkitekti i njohur, Zef Çuni thotë se është e domosdoshme që Ministria e Kulturës të ndërhyjë.

Zef Çuni, arkitekt: Është një monument me vlera të jashtëzakonshme, si monument kulture, por edhe si banesë popullore karakteristike shkodrane. Është edhe monument historik, pasi aty ka jetuar Pashko Vasa. Është e domosdoshme që Ministria e Kulturës të ndërhyjë duke qenë se është edhe 130-vjetori i vdekjes së tij. Pushteti lokal nuk i kushton vëmendje këtyre objekteve.

Pas interesimit të emisionit investigativ “Stop”, Ministria e Kulturës lëvroi fondin 10 milionë Lekë për restaurim të pjesshëm, por asgjë nuk ndryshoi.

Besara Podgorica, drejtore e DRTK Shkodër: Besoj se brenda Tetorit është në procedurë pjesa e tenderimit dhe e konkurrimit.

Rajmonda Vasa: Është e njëjta situatë. Asnjë gjë nuk është bërë te ndërhyrja. Kanë ardhur dy punëtorë të monumenteve, po është e njëjta situatë. Asnjë gjë nuk kanë bërë. Është njëlloj sic ka qenë. Unë prandaj t’i nisa edhe njëherë fotot. Dje ka rënë shi. Dje, pra,dje.

Besara Podgorica, drejtore e DRTK Shkodër tha se është garantuar një donacion, ku një firmë e licensuar në restaurim merrte përsipër ndërhyrjen dhe komplet restaurimin e çatisë. Sot, zonja Podgorica thotë se fondi do të rialokohet se nuk u kapën afatet gjatë vitit 2022.

Besara Podgorica, drejtore e DRTK Shkodër: Ne kemi garantuar një donacion, ku kjo firma e cila është e licensuar në restaurim do të marrë përsipër ndërhyrjen dhe komplet restaurimin e plotë të çatisë.

Gazetari: Thatë, donacion?

Besara Podgorica, drejtore e DRTK Shkodër: Po!

Gazetari: Po pjesa e dhjetë milionëshit?

Besara Podgorica, drejtore e DRTK Shkodër: Përveç pjesës së dhjetë milionëshit të cilën vitin tjetër do ta rialokojmë, meqenëse çatinë e kemi të përfshirë, pjesën e dhjetë milionëshit do ta rialokojmë në mënyrë që të ndërhyjmë te pjesët e tjera të cilat kanë nevojë.

Gazetari: Iku 2022-shi.

Besara Podgorica, drejtore e DRTK Shkodër: Po pra, iku, sepse të tilla ishin afatet dhe nuk i kapëm në kohë.

Gazetari: Për pjesën e tenderimit, po thoni?

Besara Podgorica, drejtore e DRTK Shkodër: Po!

Gazetari:Kaq e vështirë në Shkodër për dhjetë milionë lekë? Nuk gjeni dot një firmë?

Besara Podgorica, drejtore e DRTK Shkodër: Ne kemi dy tenderë të anulluar momentalisht, për shkak se nuk është paraqitur asnjë firmë, e cila ka licensë në restaurim dhe lejohet për të ndërhyrë në zona të tilla.

Gazetari: Ne e kemi transmetuar dy herë po njëherë dhe sërish interesohemi sepse neve nuk na intereson thjesht publikimi dhe e lëmë me kaq, por ne duam realizmin.

Besara Podgorica, drejtore e DRTK Shkodër: Patjetër!/tvklan.al





Lajmet e fundit nga