Problemi në sistemin bankar bllokon pagesat e personave në nevojë

6 Shkurt 2023, 22:12, Denoncim CNA

Jetmiri është 22 vjeç dhe është tetraplegjik. Për të kujdeset nëna e tij. Problemi i tyre është, se nuk po marrin dot rreth 4 milionë Lekë si rrjedhojë e prapambetjeve ndër vite të fituara me gjyq. Lista përbëhet edhe nga shumë familje të tjera në Bashkinë Këlcyrë.

Mamaja e Jetmirit: Ju kam thirrur sepse kemi një proces gjyqësor, problemi për këto lekët nga 2005 në 2010. Bëhet fjalë për pagesa të prapambetura që i janë mbajtur këtyre tetraplegjikëve nga 2002 deri në 2010 dhe i kemi bërë këto dokumente. Kemi dhënë 60 mijë lekë në dorë dhe na ka thënë që do t’i marrim, do t’i marrim… Djali duhet të përfitojë 3 milionë e 900 mijë Lekë.

Pasi gazetari i emisionit investigativ “Stop” në Tv Klan kontaktoi me përmbaruesin, ai tha se banka ka probleme këto kohë për shkak të sulmeve kibernetike, por pritet që shumë shpejt lekët të lëvrohen dhe t’u kalojnë familjeve.

Përmbaruesi Resul Alushani thotë se nga Këlcyra kanë ardhur ca fonde. Sipas tij, ato u kalojnë disa personave me prokurë, që ua shpërndajnë qytetarëve. Shumat kanë shkuar në bankë, por bankat kanë qenë të bllokuara, për shkak të një problemi në sistem.

Resul Alushani: Nga Këlcyra ne na kanë ardhur disa fonde, ne ua kalojmë disa personave që kanë prokurë e që iu shpërndajnë pastaj qytetarëve dhe unë i kam çuar të shumtat në bankë, por kanë qenë të bllokuar për shkak të një problemi që ka pasur në sistem banka. Për bashkinë e Këlcyrës ka qenë një person Flamur Mushamataj i autorizuar me prokurë. Ata nuk e dinë se sa luftë kemi bërë për t’i nxjerrë këto fonde, këtë nuk dinë ata. Por gjithsesi, nuk ka afat fare. Kjo është punë ditësh. Sot, ata me 100 për qind do të përpiqen t’i kalpjnë patjetër. Ndërsa ata po punojnë me një sportel, me një sistem të vjetër. Pagesa të prapambetura kanë qenë këto dhe padia përgjithësisht, pothuajse në të gjitha rastet është ngritur për ministrinë dhe bashkinë përkatëse. Nuk kanë për të pasur vonesa ato sepse në momentin që i xhirohen fondet atij Mushamatajt, ai aty është, shkon dhe ua shpërndan direkt, pastaj.

Problemi u zgjidh dhe në pak ditë paratë shkuan tek personat në nevojë./tvklan.al