Bën ndërhyrje mjekësore/ Mëson se firma nuk i ka derdhur kontributet

29 Dhjetor 2022, 22:31, Denoncim CNA

Bën ndërhyrje mjekësore/ Mëson se firma nuk i ka derdhur

Drane Gjoka një punonjëse e “Alba Shoes”, tregon se mori një raport 30-ditor pasi bëri një ndërhyrje mjekësore. Por pati probleme me sigurimet pasi kompania nuk i kishte hedhur në ISSH.

Ekonomistja i thotë se e ka fajin Institucioni i Sigurimeve. Ndërsa ky i fundit thotë se nuk janë hedhur kontributet.

“Stop” pyet ekonomisten e firmës dhe ajo këmbëngul se është në rregull. Në fillim thotë se kontributet i ka hedhur para një muaji, më pas pretendon se i ka çuar me postë para një jave dhe në fund rezulton se nuk i ka çuar fare.

Në ISSH na thonë, se kontributet, ose nuk janë hedhur, ose janë hedhur me gabime në sistem. Me fotokopjen e raportit mjeksor të paguar nga punëdhënësi dhe fotokopjen e librezës së punës, rasti i zonjës Dranë Gjoka, zgjidhet.

Ekonomistja “Alba Shoes”: Për 14 ditëshin e raportit për punëmarrësin, unë ia kam paguar, por janë sigurimet shoqërore ato, që e kanë vonuar raportin e Dranes, për të kaluar sigurimet.

Ekonomistja “Alba Shoes”: Jo, para një muaji e ca, por sigurimet shoqërore vonojnë. Ia kam dorëzuar, sepse kam mandatin e postës. Para një jave. Po para një jave, pasi ka qenë dhe Drania. Çështje vonese, po pra, çështje vonese. Atëherë mbetet nga ana e subjektit. Është dorëzuar 2 herë.

Gazetarja: Po pse 2 herë apo nuk ka qenë e plotë herën e parë?

Ekonomistja “Alba Shoes”: Dokumentat e Dranes ia kam dorëzuar 2 herë zonjë.

Gazetarja: Ka 2 Drane aty te puna që ia ke dërguar 2 herë?

Ekonomistja “Alba Shoes”: Jo, është një. Nuk e dimë se si ka qenë.

Gazetarja: Unë erdha këtu tek ISSH-ja dhe mora të gjithë infromacionin, e dashur ti nuk është se e ke vonuar ti nuk e ke sjellë fare.

Ekonomistja “Alba Shoes”: Jo, jo!

Gazetarja: Ti duhet të sjellësh një fotokopje të raportit mjekësor.

Ekonomistja “Alba Shoes”: Ia kam sjellë dhe raportin.

Gazetarja: Nuk ia ke sjellë dhe duhet t’i sjellësh dhe fotokopjen e librezës së punës dhe mos e vono më Dranen.

Ekonomistja “Alba Shoes”: Zonjë e dashur, ia kam dërguar.

Gazetarja: Të lutem, mos na ofendo inteligjencën, ti je gocë e shkathët, e zgjuar dhe e mbyll këtë muhabet direkt. Dorëzo këto të dyja dhe je në rregull.

Ekonomistja “Alba Shoes”: Ia kam dërguar. Ia kam dorëzuar moj, ia kam dorëzuar moj! Po tashi çfarë faji kam unë, çfarë faji kam unë? Po është e zgjidhur, moj./tvklan.al