Vrasja e gjyqtarit Kalaja/ Lala: Sot duhet të kishte pasur një zinxhir dorëheqjesh, krimi ndodhi 500 m larg zyrës së Prodës

6 Tetor 2025, 21:17, Aktualitet CNA

Vrasja e gjyqtarit Kalaja/ Lala: Sot duhet të kishte pasur një zinxhir

Gazetarja Klodiana Lala ka folur mbrëmjen e sotme lidhur me ngjarjen e rëndë që ka ndodhur sot në Gjykatën e Apelit ku u vra me armë zjarri, gjyqtari Astrit Kalaja.

Lala u shpreh në emisionin "Log" se gjuha e politikës i ka inkurajuar njërezit e botës së krimit të kërcënojnë dhe të akuzojnë. Gazetarja shprehet se Policia e Shtetit nuk e ka bërë detyrën e saj për të parandaluar këtë ngjarje. Më tej thotë se sot duhet të kishte pasur zinxhir dorëheqjesh dhe shton se gjithçka ka ndodhur vetëm 500 metra larg zyrës së Ilir Prodës, drejtorit të Policisë së Shtetit.

"Gjuha e politikës i ka inkurajuar njerëzit e botës së krimit të drejtojnë akuzën, gishtin, tentativën, kërcënimin, etj. Në 3 muajt e fundit ke një trupë gjykuese në Apel që është kërcënuar dhe nuk është reaguar, Valdete Hoxha, është kërcënuar dhe nuk është reaguar, gjyqtari Fatri Islamaj është kërcënuar dhe nuk është reaguar. I njëjti gjyqtar që sot është viktimë ka pasur debat me këtë palë që ishte në process dhe askush nuk e vuri ujin në zjarr. Policia e Shtetit nuk ka bërë detyrën për të reaguar. Sot duhet të kishte pasur një zinxhir dorëheqjesh. Ka ndodhur krimi më i rëndë, vetëm 500 metra larg zyrës së Ilir Prodës. Insitucionet duhet të na thonë si hyri ky person në gjykatë me armë", u shpreh Lala./CNA