Vrasja e gjyqtarit Astrit Kalaja/ Reagon ILD: Siguria duhet të jetë prioritet absolut për të gjithë

6 Tetor 2025, 19:20, Aktualitet CNA

Vrasja e gjyqtarit Astrit Kalaja/ Reagon ILD: Siguria duhet të jetë

Inspektoriati i Lartë i Drejtësisë ka reaguar vrasjen e gjyqtarit Astrit Kalaja, të ndodhur në një nga sallat e gjyqit të Gjykatës së Apelit.

Në reagim thuhet se kjo ngjarje tragjike prek të gjithë trupën gjyqësore, sistemin e drejtësisë, shtetin e së drejtës dhe çdo institucion publik. Gjithashtu theksohet se siguria duhet të jetë prioritet absolut për të gjithë.

REAGIMI I PLOTË:

Inspektori i Lartë i Drejtësisë shpreh tronditjen e thellë nga vrasja e gjyqtarit Astrit Kalaja në krye të detyrës, brenda ambienteve të Gjykatës së Apelit Tiranë dhe plagosja e dy qytetarëve nga të shtënat me armë.

Inspektori i Lartë i Drejtësisë shpreh ngushëllimet më të ndjera familjes, të afërmve, kolegëve dhe miqve të gjyqtarit Astrit Kalaja. Uroj shërim të shpejtë për të plagosurit e këtij akti kaq të rëndë.

Tragjedia e sotme, që i mori jetën një magjistrati prek të gjithë trupën gjyqësore, sistemin e drejtësisë, shtetin e së drejtës dhe çdo institucion publik.

Siguria duhet të jetë prioritet absolut për të gjithë. Në institucionet e sistemit të drejtësisë dhe çdo instancë shtetërore ligjzbatuese duhet të angazhohemi pa humbur kohë në garantimin e paprekshmërisë së çdo përfaqësuesi të drejtësisë, që ushtron detyrën në emër të ligjit.

Duke shprehur solidaritetin me trupën gjyqësore, inkurajoj çdo gjyqtar e çdo prokuror, që përtej ngjarjes së rëndë, të vazhdojë detyrën duke zbatuar ligjin./CNA