Ekzekutimi i gjyqtarit në sallën e gjyqit/ GJKKO: Akt kriminal që kërcënon pavarësinë e gjyqësorit

6 Tetor 2025, 19:52, Aktualitet CNA

Ekzekutimi i gjyqtarit në sallën e gjyqit/ GJKKO: Akt kriminal që

Gjykata e Posaçme kundër Korrupsionit dhe Krimit të Organizuar ka reaguar për vrasjen e gjyqtarit Astrit Kalaja në krye të detyrës.

GJKKO shprehet se vrasja e gjyqtarit është një goditje e rëndë për të gjithë sistemin gjyqësor dhe për shoqërinë shqiptare. Gjithashtu theksohet se kjo ngjarje tragjike është një alarm për gjendjen e sigurisë në të cilën ushtrojnë detyrën magjistratët në Shqipëri.

Më tej, GJKKO shton se ky akt kriminal është një kërcënim serioz ndaj pavarësisë së gjyqësorit, integritetit të funksionit të magjistratit dhe besimit të qytetarëve në shtetin e së drejtës.

Reagimi i GJKKO:

Trupa gjyqësore e Gjykatës së Posaçme të Shkallës së Parë për Korrupsionin dhe Krimin e Organizuar shpreh me dhimbje dhe indinjatë të thellë reagimin ndaj ngjarjes tragjike të ndodhur sot, ku humbi jetën në mënyrë të dhunshme gjyqtari i Gjykatës së Apelit, z. Astrit Kalaja.

Në këto momente të vështira, shprehim ngushëllimet më të sinqerta dhe solidaritetin tonë me familjen, të afërmit dhe kolegët e gjyqtarit Kalaja. Humbja e një përfaqësuesi të drejtësisë në mënyrë të tillë është një goditje e rëndë për të gjithë sistemin gjyqësor dhe për shoqërinë shqiptare në tërësi.

Ngjarja e sotme është një alarm për gjendjen e sigurisë në të cilën ushtrojnë funksionin magjistratët në Republikën e Shqipërisë. Gjyqtarët janë shtylla të sistemit të drejtësisë dhe garantues të shtetit të së drejtës, ndaj siguria e tyre personale është jo vetëm një detyrim institucional, por një domosdoshmëri për funksionimin normal të sistemit demokratik dhe sundimit të ligjit.

Ky akt kriminal është një kërcënim serioz ndaj pavarësisë së gjyqësorit, integritetit të funksionit të magjistratit dhe besimit të qytetarëve në shtetin e së drejtës. Askush që mban mbi supe përgjegjësinë për të garantuar zbatimin e ligjit nuk duhet të ndjehet i pambrojtur./CNA