Vrasja e gjyqtarit Kalaja/ Avokati i Popullit: Një nga ngjarjet më të paprecedenta në historinë e drejtësisë shqiptare

6 Tetor 2025, 19:38, Aktualitet CNA

Vrasja e gjyqtarit Kalaja/ Avokati i Popullit: Një nga ngjarjet më

Avokati i Popullit ka reaguar për vrasjen e gjyqtarit Astrit Kalaja. Në reagim thuhet se kjo është një nga ngjarjet më të paprecedenta në historinë e drejtësisë shqiptare dhe se është një alarm i rëndë për shtetin ligjor, sigurinë publike dhe për shoqërinë tonë.

Avokati i Popullit thekson nevojën urgjente për përgjegjësi institucionale në çdo hallkë që ka për detyrim të garantojë jetën dhe integritetin e atyre që i shërbejnë drejtësisë. Gjithashtu më tej thuhet se kjo ngjarje e rëndë kthen vështrimin te një sistem i mbingarkuar ndër vite, me vakanca të theksuara.

POSTIMI I PLOTË:

Një gjyqtar, përfaqësues i pushtetit të drejtësisë, u vra sot brenda sallës së gjyqit teksa jepte vendimin.

Kjo është një nga ngjarjet më të paprecedenta në historinë e drejtësisë shqiptare dhe një alarm i rëndë për shtetin ligjor, për sigurinë publike dhe për shoqërinë tonë.

Avokati i Popullit shpreh tronditjen e thellë për humbjen e gjyqtarit Astrit Kalaja dhe në të njëjtën kohë, ngre me forcë nevojën urgjente për reflektim dhe përgjegjësi institucionale, në çdo hallkë që ka detyrimin të garantojë jetën dhe integritetin e atyre që i shërbejnë drejtësisë.

Përtej vetë veprimit kriminal të ndodhur sot, kjo ngjarje e rëndë na detyron të kthejmë vështrimin tek rrënjët e një sistemi të mbingarkuar ndër vite, me vakanca të theksuara dhe me një ngarkesë që e ka penguar të funksionojë me eficiencë — jo vetëm në raport me pritshmëritë e qytetarëve, por shpesh edhe nën standardet e periudhës para reformës në drejtësi.

Po aq shqetësuese mbetet kultura e munguar ligjore që shpesh e sheh gjykatën si armik, jo si garanci të së drejtës — dhe diskursi publik që, në vend të argumentit dhe respektit ndaj ligjit, ushqen mosbesimin, përbuzjen dhe agresionin.

Në këtë klimë, drejtësia është e pambrojtur, dhe me të — e pambrojtur mbetet edhe vetë shoqëria.

Drejtësia nuk mund të ushtrohet nën frikë!/CNA