Vrasja e 7-vjeçares/ Bledi Çuçi thellon skandalin

5 Gusht 2022, 10:27, Aktualitet CNA

Kur kanë kaluar tri ditë nga tragjedia e Himarës, është kujtuar që të reagojë Ministri i Brendshëm, Bledi Çuçi.

Në vend që të japë llogari se po mblidhen viktimat rrugëve, e deteve, ai është mbrojtur duke sulmuar kreun e PD-së, Sali Berisha.

Sipas tij, ka një përpjekje për të prodhuar fakte që të ilustrojnë akuzat e gatshme të Sali Berishës ndaj meje pas tragjedisë së fundit në Himarë.

“Për respekt të opinionit publik, që me të drejtë është i ngarkuar nga tragjedia e vajzës 7-vjeçare dhe dhimbja e familjes së saj, dua të sqaroj se sajesat me emrin tim dhe një shoqatë velierash sportive që kam krijuar me miq pasionantë të tyre, nuk kanë lidhje me asnjë biznes dhe aq më tepër me skafe apo gomone.

I hedh poshtë me neveri këto sajesa, pasi duan të keqpërdorin në mënyrë të neveritshme këtë ngjarje tragjike, për ta mbajtur gjallë për hallet e tyre politike”, ka shkruar Çuçi që më shumë duket i prekur se i është zbuluar biznesi i skafeve sesa tragjedia që ka ndodhur.

Më tej ai ka shkruar se ka heshtur pasi është përpjekur të flasë me veprime konkrete.

“Gjatë këtyre ditëve të rënda për çdo shqiptar, por veçanërisht për familjen e vajzës dhe për ne që jemi përgjegjës për sigurinë e jetës së tyre, jam përpjekur të flas me veprime konkrete kundër fajtorëve të asaj tragjedie, të cilët tani janë para drejtësisë, përfshirë gjithashtu dhe të gjithë zinxhirin komandues të Policisë Kufitare Vlorë", shkruan ai.

Po në të njëjtin reagim Bledi Çuçi pohon se ka 30 vjet që është kundër Sali Berishës dhe 30 vjet që po përballet me të, duke dalë kështu edhe kundër ndryshimeve politike të 1992 dhe vendosjes së pluralizmit politik në Shqipëri.

Ndërkohë Çuçi nuk është prej 30 vitesh në politikë. Ai ka më pak vite që bën karrierë politike edhe këtë e bën si burri i dytë i gruas të tretë të Edi Ramës.

"Mendoj se kjo është rruga e duhur për të respektuar dhimbjen e familjes së vajzës dhe të afërmëve të saj. Rruga për t’u përballur me baltën e Sali Berishës është 30-vjeçare dhe nuk më sfidon. Thjesht e kemi detyrim ndaj shqiptarëve të ndajmë fatin e Shqipërisë nga fati dhe balta e tij”, përfundon Çuçi reagimin./CNA.al