E fundit!

13:05 Aktualitet

Kallëzohet në SPAK Edi Rama

Grupi Parlamentar i PD-së kallëzon në SPAK Edi Ramën për v...

Veterinerët detyrohen të bëjnë propagandë për ministren/ Resuli nxjerr mesazhin

23 Qershor 2024, 19:33, Aktualitet CNA

Veterinerët detyrohen të bëjnë propagandë për

Presidenti i Urdhrit të Mjekut Veterinar, Ervin Resuli. Foto e marrë nga rrjetet e tij sociale

Presidenti i Urdhrit të Mjekut Veterinar, Ervin Resuli, ka publikuar një mesazh në “WhatsApp”, ku veterinerëve u kërkohet të pëlqejnë dhe të shpërndajnë në rrjetet e tyre sociale faqen e ministres së Bujqësisë dhe të disa institucioneve në varësi të saj.

Resuli i kërkon veterinerëve të refuzojnë këto mesazhe dhe të mos i binden një urdhri politik.

Ai shkruan në rrjetet sociale se zbatimi i një urdhri të tillë bie ndesh me parimet e veterinerëve, ndërsa kërkon që çdo rast abuzimi të denoncohet pranë Urdhrit të Mjekut Veterinar.

Mesazhi i publikuar nga Ervin Resuli

Statusi i plotë:

Refuzoni mesazhet e turpit!

Për kolegët e nderuar veterinerë,

Disa nga ju kanë shprehur shqetësime të drejta lidhur me detyra që nuk lidhen me profesionin fisnik të Mjekut Veterinar. Çdo përpjekje për t'ju detyruar të kryeni punë që nuk kanë lidhje me funksionin tuaj primar si Mjek Veterinar është abuzim mbi ju. Detyrimi për të hapur profile në Facebook, Instagram apo rrjete të tjera sociale, ose urdhrat për të bërë "like" dhe "share" lajme të ministrave, drejtorëve apo të tjerëve, bien ndesh me parimet e betimit tonë profesional.

Ne nuk jemi përfaqësues të partive dhe nuk kemi për qëllim t’i shërbejmë apo të mbështesim ministrat apo drejtorët me anë të aktiviteteve tona në rrjetet sociale. Profesioni ynë është i qartë në objektivat për përmbushjen e ligjit: "Mjeku human shpëton njeriun, mjeku veterinar shpëton njerëzimin". Çdo përpjekje për të shkelur betimin dhe kodin e etikës të Mjekut Veterinar meriton përçmim dhe përbuzje.

Të nderuar kolegë, duhet të jeni krenarë dhe të mbani dinjitetin për t’ju bërë ballë kërkesave absurde dhe të pajustifikueshme që kërkojnë "anadollakët". Ne jemi Mjekë Veterinarë dhe dinjitetin tonë e mbrojmë vetë. Ju nxis të raportoni çdo rast abuzimi pranë Urdhrit të Mjekut Veterinar për të çuar në vend dinjitetin e profesionit tonë.

Me respekt,

Ervin RESULI/ CNA