web counter
LEXO PA REKLAMA!

SHKARKO APP

App Store
Google Play

U nda nga jeta në moshën 99-vjeçare/ Kush ishte Koço Qëndro, artisti që ia kushtoi jetën skenës

4 Korrik 2026, 11:25, Aktualitet CNA

U nda nga jeta në moshën 99-vjeçare/ Kush ishte Koço

Aktori i madh i teatrit dhe filmit shqiptar, Koço Qëndro, është ndarë nga jeta në moshën 99-vjeçare. Artisti ka ndërruar jetë në Korçë ku dhe jetonte.

Për Korçën dhe gjithë Shqipërinë, Qëndro ishte një artist i jashtëzakonshëm, i cili do të mbetet një prej ikonave më të mëdha të teatrit dhe humorit shqiptar. 

Kush ishte artisti i madh Koço Qëndro

I lindur në fshatin Senicë të Delvinës, Koço Qëndro përjetoi një rini krejt ndryshe nga brezat e sotëm. Në vitet e luftës, ende adoleshent, ai u bë partizan dhe mori pjesë në luftimet në qarkun e Korçës. Edhe pse ëndrra e tij ishte të bëhej mësues, jeta e çoi drejt një rruge tjetër, asaj të artit, ku do të linte gjurmë të pashlyeshme.

U nda nga jeta në moshën 99-vjeçare/ Kush ishte Koço

Rreth fillimit të viteve ’60-të, ai spikati si aktor i Estradës së Maliqit dhe më pas iu bashkua trupës së teatrit të Korçës, për të mos iu ndarë më kurrë skenës. Me dhjetëra role në teatër, estradë dhe kinematografi, Koço Qëndro u kthye në një nga figurat më të dashura për publikun shqiptar.

Mes roleve që mbeten të paharrueshme në kujtesën e publikut janë Sir Endrju Eguiçik në “Nata e Dymbëdhjetë” të Shekspirit dhe Harpagoni në “Kopraci” të Molierit, personazhe që ai i solli në skenë me një mjeshtëri unike. Edhe në moshën 92-vjeçare, ai riktheu në skenën korçare “Koprracin”, duke dëshmuar se arti për të nuk kishte moshë.

Në kinematografi, ai ka lënë gjurmë me interpretime karakteriale që plotësojnë portretin e tij si aktor poliedrik. Te filmi "Përballimi" (1976), ai spikat në rolin e Sefedinit (pronari i mullirit), duke sjellë me vërtetësi tipologjinë e tregtarit të kohës. Batuta e tij në këtë film: Ore mos na e vini re se helbete pa shkollë jemi, po unë desha të di, ju për budallenj na merrni neve?, është cituar shpesh si një nga pasazhet e tij më popullore.

U nda nga jeta në moshën 99-vjeçare/ Kush ishte Koço

Gjithashtu, ai ka dhënë një kontribut të spikatur në filmin "Vendimi" (1984) në rolin e Aleks Xinxës, si dhe në filmat "I teti në bronz" (1970) dhe "Vitet e para" (1965). Çdo pasazh i tij në film karakterizohet nga një natyrshmëri e rrallë dhe një plastikë që i jepte jetë çdo figure, qoftë ajo dramatike apo komike.

Në rrëfimet e tij, Koço Qëndro kujtonte me shumë emocion bashkëpunimin me emra të mëdhenj të teatrit shqiptar, si Piro Mani, Dhimitër Orgocka, Pandi Raidhi dhe Sokrat Mio, artistë që shënuan historinë e skenës shqiptare.

Edhe në 99-vjetorin e lindjes, më 15 maj, Koçoja fliste me mall për teatrin, për publikun dhe për vitet e arta të artit shqiptar. Ai mbetet simbol i përkushtimit, thjeshtësisë dhe dashurisë për skenën.

U nda nga jeta në moshën 99-vjeçare/ Kush ishte Koço

Në emër të Këshillit të Qarkut Korçë, Koço Qëndros iu akordua titulli “Ambasador i Qarkut”, si vlerësim për kontributin e jashtëzakonshëm në teatër dhe kinematografi dhe për përcjelljen e vlerave artistike ndër breza. /CNA 





Lajmet e fundit nga