web counter
LEXO PA REKLAMA!

SHKARKO APP

App Store
Google Play

Protesta para Kuvendit/ Komiteti Shqiptar i Helsinkit: Policia përdori forcë joproporcionale

3 Korrik 2026, 22:13, Aktualitet CNA

Protesta para Kuvendit/ Komiteti Shqiptar i Helsinkit: Policia përdori

Komiteti Shqiptar i Helsinkit ka shprehur shqetësimin lidhur me përshkallëzimin e situatës gjatë protestës së zhvilluar më 2 korrik  përpara Kuvendit. Në përfundim të monitorimit në terren, organizata denoncon aktet e dhunës të kryera nga individë të veçantë, por thekson se reagimi i Policisë së Shtetit ka qenë i papërshtatshëm dhe në shkelje të standardeve ligjore.

KShH thotë se e drejta për tubim paqësor është e garantuar me Kushtetutë dhe Konventën Evropiane të të Drejtave të Njeriut. Sipas organizatës, fakti që disa individë kryen akte të izoluara dhune nuk ia heq karakterin paqësor protestës në tërësi dhe nuk e justifikon përdorimin e forcës ndaj pjesëmarrësve të tjerë.

Monitorimi tregon se situata ishte e qetë për një kohë të gjatë, derisa sjellja e policisë ndryshoi menjëherë pas incidentit me automjetet në ambientet e Kuvendit, duke kaluar te rrethimi dhe më pas te gazi lotsjellës.

Një prej gjetjeve më shqetësuese të KShH-së është përdorimi i gazit lotsjellës pa u paraprirë nga një paralajmërim publik dhe pa lënë kohë për shpërndarje vullnetare të protestuesve, siç e kërkon Ligji "Për Policinë e Shtetit". Kjo masë, sipas Komitetit, ka prekur në mënyrë të padiferencuar edhe gazetarët, vëzhguesit dhe protestuesit paqësorë, duke u kthyer në një ndërhyrje joproporcionale që mund të përbëjë keqtrajtim.

KShH ka denoncuar gjithashtu raste konkrete të përdorimit të forcës fizike, si shkopinj gome apo goditje, ndaj personave që ishin tashmë të neutralizuar dhe të shtrirë në tokë.

Komiteti Shqiptar i Helsinkit bën thirrje për një hetim të menjëhershëm, të pavarur dhe efektiv mbi veprimet e forcave të policisë gjatë protestës, duke nënvizuar se detyrimi i shtetit nuk kufizohet vetëm në lejimin e protestës, por edhe në garantimin e ushtrimit të saj në mënyrë të sigurt. /CNA





Lajmet e fundit nga