Tensionet në protestën para Kuvendit/ AGSH dënon sulmet ndaj punonjësve të medias

3 Korrik 2026, 11:59, Aktualitet CNA

Tensionet në protestën para Kuvendit/ AGSH dënon sulmet ndaj

Protesta e së enjtes u shoqërua me tensione mes protestuesve dhe policisë, ku kjo e fundit përdori gaz lotsjellës dhe ujë. Megjithatë, ajo që ka ngjallur shqetësim janë incidentet e rënda ndaj përfaqësuesve të medias në terren.

Asociacioni i Gazetarëve të Shqipërisë ka dënuar me forcë të gjitha aktet e dhunës dhe pengimit të gazetarëve gjatë protestës së 2 korrikut në kryeqytet, qofshin këto nga forcat e rendit apo nga vetë protestuesit. Sipas raportimeve dhe pamjeve të dokumentuara nga AGSH, disa gazetarë dhe fotoreporterë të televizioneve dhe agjencive të ndryshme janë dhunuar dhe penguar nga punonjës të Policisë së Shtetit. Për këto episode, AGSH i bën thirrje Agjencisë së Mbikëqyrjes Policore të nisë pa vonesë hetime të plota ndaj efektivëve të përfshirë.

Ndërkohë, janë regjistruar edhe sulme të papranueshme nga ana e protestuesve. Ekipe televizive dhe gazetarë të terrenit janë cenuar fizikisht dhe penguar gjatë raportimeve të tyre të drejtpërdrejta nga protestues të paidentifikuar, si dhe nga individë që sipas raportimeve u përkasin radhëve të partisë “Shqipëria Bëhet”.

AGSH i kërkon Policisë së Shtetit të identifikojë dhe të ndëshkojë sipas ligjit autorët e këtyre sulmeve. Asociacioni rithekson se siguria e punonjësve të medias është element themelor për lirinë e informimit dhe çdo akt intimidimi ndaj tyre duhet të ndëshkohet pa asnjë përjashtim.

Reagimi i AGSH-së

Asociacioni i Gazetarëve të Shqipërisë (AGSH) dënon me forcë të gjitha aktet e dhunës dhe pengimit të gazetarëve gjatë protestës së zhvilluar më 2 korrik në Tiranë, pavarësisht se nga kush janë kryer.

Sipas raportimeve të mbledhura nga AGSH dhe pamjeve të dokumentuara, gazetari i Syri TV, Fatjon Gjinaj, është dhunuar nga punonjës të Policisë së Shtetit dhe penguar gjatë ushtrimit të detyrës. Gjithashtu, janë cenuar fizikisht fotoreporteri i ATSH-së, Andrin Hoxha të cilit i është tentuar t’i merret aparati dhe penguar në punë, si dhe fotoreporteri i NurPhoto, Vlasov Sulaj, gjatë ushtrimit të detyrës së tyre.

AGSH i bën thirrje Agjencisë së Mbikëqyrjes Policore (AMP) të nisë pa vonesë hetime të plota dhe të pavarura për sjelljen e efektivëve të Policisë së Shtetit ndaj gazetarëve dhe të mbajë përgjegjës çdo punonjës policie që ka ushtruar dhunë ose ka penguar punën e medias.

Po ashtu, dënojmë edhe sulmet e protestuesve ndaj gazetarëve. Sipas informacioneve të bëra publike dhe të verifikuara nga AGSH, protestuesi Arbër Lleshaj ka cenuar fizikisht gazetarin e Top Channel, Muhamed Veliu gjate ushtrimit te detyrës.

Ndërkohë, gazetarja e Top News, Kleida Muka, është penguar dhe është cenuar fizikisht nga protestues të paidentifikuar gjatë një raportimi të drejtpërdrejtë.

Gjithashtu, sipas njoftimit të Ora News, protestues kanë penguar dhe kanë cenuar fizikisht ekipin e televizionit, gazetarin Bekim Bici dhe operatorin Atilio Bleta, ndërsa televizioni ka deklaruar se personat e përfshirë kanë qenë pjesëtarë të partisë “Shqipëria Bëhet”.

AGSH i kërkon Policisë së Shtetit të identifikojë dhe të vërë përpara përgjegjësisë ligjore të gjithë autorët e sulmeve ndaj gazetarëve dhe punonjësve të medias.

Asociacioni i Gazetarëve të Shqipërisë rithekson se siguria e gazetarëve, fotoreporterëve dhe punonjësve të medias dhe e drejta për të raportuar lirshëm janë elemente themelore të lirisë së medias dhe të së drejtës së publikut për t’u informuar. Çdo akt dhune apo intimidimi ndaj tyre është i papranueshëm dhe duhet të hetohet e të ndëshkohet pa asnjë përjashtim./CNA