E fundit!

11:39 Politikë

"Urrejtësit besnikë janë prova që nuk po jeton kot”/ Postimi i Ramës për ditëlindjen e tij

Kryeministri Edi Rama ka bërë një reagim në rrjetet social...

Turizmi mes çmimit dhe fluksit/ Rritet numri i turistëve, por ulen shpenzimet e tyre

4 Korrik 2026, 10:22, Aktualitet CNA

Turizmi në Shqipëri vazhdon të regjistrojë shifra pozitive në hyrje, por ky sezon ka nxjerrë në pah një dinamikë të re mes kostove, të ardhurave dhe pritshmërive.

Të dhënat zyrtare tregojnë se fluksi i vizitorëve të huaj ka pësuar rritje të qëndrueshme krahasuar me një vit më parë, megjithatë kjo nuk po përkthehet në fitime të larta për të gjithë operatorët në treg.

Përballë shtrenjtimit të faturave në disa zona të njohura bregdetare, turistët po tregohen shumë më të matur me shpenzimet. Ata po zgjedhin gjithnjë e më shumë akomodimet me qira ditore përmes platformave online, të cilat u ofrojnë fleksibilitet dhe çmime më të ulëta.

Kjo ka sjellë shqetësim te strukturat tradicionale hoteliere, të cilat në jo pak raste kanë raportuar dhoma të zbrazëta apo anulime rezervimesh në ditët e pikut.

Një tjetër fenomen i këtij viti është profili i vetë turistit dhe rënia e konsumit. Një pjesë e mirë e atyre që po vizitojnë vendin tonë i përkasin kategorisë buxhetore, pasi pushuesit po orientohen drejt ushqimit të shpejtë, gatimit në apartamente dhe blerjeve në supermarkete për të reduktuar shpenzimet e shportës.

Nga ana tjetër vihet re një zhvendosje pozitive gjeografike. Zonat jo bregdetare, si agroturizmet, qytetet historike dhe turizmi malor po njohin një rritje të fortë të vizitorëve. Këto destinacione po tërheqin ata pushues që kërkojnë natyrën dhe ofrojnë një balancë shumë më të stabilizuar mes çmimit dhe shërbimit të ofruar.

Përtej luhatjes së çmimeve, e gjithë kjo situatë rëndohet nga mungesa e theksuar e stafit të kualifikuar. Bizneset po përballen me vështirësi në gjetjen e punëtorëve, çka ndikon drejtpërdrejt në cilësinë e shërbimit.

Ekspertët e ekonomisë paralajmërojnë se nëse bilanci mes tarifave dhe shërbimit nuk përmirësohet, tregu ynë turistik rrezikon të humbasë avantazhin konkurrues përballë vendeve të tjera të rajonit. /CNA