“U hap kanal mllefi ndaj meje”/ Rama: Shqipëria, në qendër të një përplasjeje globale të algoritmeve

20 Qershor 2026, 11:48, Aktualitet CNA

Kryeministri Edi Rama ka deklaruar se zhvillimet e fundit rreth projektit në Zvërnec janë shndërruar në një debat të gjerë publik dhe online, duke u kthyer, sipas tij, në një “histori paralajmëruese” për mënyrën si funksionon sot hapësira digjitale dhe politike.

Rama u shpreh se në epokën e rrjeteve sociale një ngjarje lokale mund të shndërrohet shpejt në përplasje globale.

Sipas tij, ky fenomen nuk sjell më shumë dije apo mirëkuptim, por përkundrazi prodhon zemërime, identitete të polarizuara politike e fetare, si dhe përhapje të shpejtë të gënjeshtrave në raport me faktet dhe arsyetimet.

Kryeministri theksoi gjithashtu se një projekt zhvillimi në Shqipëri është bërë pjesë e një lufte ideologjike që, sipas tij, nuk ka lidhje me realitetin në vend dhe nuk ka objekt aty.

Rama e cilësoi situatën si një “histori paralajmëruese”, jo për mandatin e tij apo për shumicën qeverisëse, por për demokracinë në epokën e algoritmit, duke nënvizuar nevojën që, sipas tij, aktorët me përgjegjësi qeverisëse të lexojnë dhe kuptojnë më mirë këto dinamika.

“U hap një kanal për mllefin kundër meje, kundër jush dhe kundër PS-së.
Kjo kohë e re kur një rrahje lokale bëhet përplasje globale nuk transporton dije dhe miqësi të reja, por zemërime, identitete politike, fetare, agresione, gënjeshtra shumë më shpejt se faktet dhe arsyetimet.

Një projekt zhvillimi në Shqipëri u bë pjesë e një lufte ideologjike që nuk ka lidhje në Shqipëri dhe nuk ka objekt aty. Shqipëria u bë zog dhe u gjendëm në mes të saj si skemë.

Kjo është një histori paralajmëruese, jo për mandatin tim, as për shumicën, por për demokracinë e epokës së algoritmit, si dhe për nevojën që ne të parët me përgjegjësinë e atyre që kanë mandatin të udhëheqin Shqipërinë të lexojmë këtë histori sa më drejt për të qenë të përgatitur sa më mirë.

Ky është vetëm fillimi. Ne mund të bëjmë atë që bëhet, për të kuptuar politikën sot është më mirë të largohesh pak prej saj dhe të hapësh librat e historisë.

Shumë kohë përpara se bota të kishte internet dhe aspak çuditërisht ata mund të na ndihmojnë të kuptojmë atë që po ndodh shumë më mirë se ata që na tregojnë gishtin ndërsa gishti tregon hënën”, tha Rama./ CNA