web counter
LEXO PA REKLAMA!

SHKARKO APP

App Store
Google Play

E fundit!

x

Trafiku i mbetjeve të rrezikshme/ Muçollari: Dolën fajtorë disa specialistë, nuk pati asnjë përgjegjësi politike

4 Shkurt 2026, 12:15, Aktualitet CNA

Trafiku i mbetjeve të rrezikshme/ Muçollari: Dolën fajtorë

Anëtari i Kryesisë së PD-së, Grigels Mucollari, ka dhënë një deklaratë për mediat nga selia blu, ku u shpreh se për trafikun e paligjshëm të mbetjeve të rrezikshme nuk pati asnjë përgjegjësi politike.

Muçollari tha se Prokuroria e Durrësit pas një viti hetime, nxori fajtorë disa specialistë dhe drejtorë të nivelit të mesëm. Ai e cilësoi këtë si një krim edhe më të rëndë se ai mjedisor.

Në fund të deklaratës, Muçollari tha se kjo është një tjetër arsye pse qytetarët duhet të protestojnë më 10 shkurt kundër qeverisë.

“Aksioni i prokurorisë kundër trafikut të paligjshëm të mbetjeve të rrezikshme provoi një fakt të thjeshtë: për këtë krim të rëndë mjedisor nuk ka asnjë përgjegjësi politike. Ministrja e Mjedisit nuk mban përgjegjësi. Drejtori i Portit të Durrësit nuk mban përgjegjësi. Siç e kemi paralajmëruar nga kjo foltore, por edhe në terren, Prokuroria e Durrësit amnistoi Mirela Kumbaron dhe Pirro Vengun për krimin më të madh mjedisor të regjistruar në vend.

Kemi parë shfaqjet publike të Kumbaros si ministre, duke ndjekur qytetarët dhe duke i fyer për një qese mbeturinash. Ndërkohë, nën përgjegjësinë e saj, 2800 tonë mbetje të rrezikshme u ngarkuan në Elbasan, u transportuan në Durrës dhe u nisën drejt Tajlandës. Kemi parë po ashtu shfaqjet e Pirro Vengut si drejtor i Portit të Durrësit, me deklarata për forcimin e sigurisë dhe kontrolleve, në bashkëpunim me policinë dhe doganat. Mburrje dhe propaganda boshe.

Në realitet, nën drejtimin e tij, 2800 tonë mbetje të rrezikshme, të shpërndara në 108 kontejnerë, u ngarkuan pa asnjë pengesë dhe u nisën drejt Tajlandës. Dhe kjo nuk ishte ngarkesa e parë. Ishin disa të tilla. Rreth 50 mijë tonë mbetje do të kishin ndjekur të njëjtin itinerar, po të mos ishte ndërhyrja e autoriteteve të vendeve të tjera dhe Rrjeti i Bazelit.

Prokuroria e Durrësit mori më shumë se një vit hetim dhe arriti në një përfundim të paracaktuar: fajtorë janë disa specialistë dhe disa drejtorë të nivelit të mesëm. Ky është një krim i dytë, edhe më i rëndë se ai mjedisor: krimi i pandëshkueshmërisë. Mesazhi u dha qartë edhe një herë: njerëzit e Edi Ramës nuk preken. Ashtu siç po mbrohen edhe sot figura të tjera të përfshira në afera të rënda.

Edhe pse të lidhur drejtpërdrejt me trafikun e paligjshëm të mbetjeve të rrezikshme, përgjegjësit jo vetëm që nuk u ndëshkuan, por u promovuan. Kumbaron e 2800 tonëve të mbetjeve të rrezikshme e dërguan të ‘edukojë’ fëmijët tanë. Vengun e 108 kontejnerëve të rrezikshëm e caktuan të ‘mbrojë’ gjithë atdheun. Kjo ndodh kur përgjegjësia, si hallkë morale e shoqërisë, nuk ekziston më për qeverinë. Në këto kushte, reagimi nuk është zgjedhje. Është detyrim. Të bashkohemi më 10 shkurt, ora 17:00 te Kryeministria, ku mbrohen dhe frymëzohen të gjitha mbetjet e rrezikshme, mjedisore, politike dhe shoqërore. Duhet ndalur këta banditë të cilët nuk ndalen para asgjëje”, tha Muçollari. /CNA





Lajmet e fundit nga