Programi i Praktikave të Punës për studentët e ekselencës/ Rama: Punësoi në administratë 1600 persona

4 Shkurt 2026, 11:33, Aktualitet CNA

Programi i Praktikave të Punës për studentët e

Kryeministri Edi Rama ishte sot i pranishëm në eventin e Agjencisë Kombëtare të Rinisë për rezultatet e arritura në përmbyllje të Thirrjes së 10-të të Programit Kombëtar të Praktikave të Punës për studentët e ekselencës.

Gjatë fjalës së tij, Rama u shpreh se ky program ka punësuar në administratën e shtetit 1600 punonjës, ndërsa shtoi se ka kapërcyer edhe ngërçin e eksperiencës për këta të rinj.

Ndër të tjera, Rama paralajmëroi edhe një projekt të qeverisë me Komisionin Europian, një projekt që synon të identifikojë dhe aktivizojë të rinjtë që kanë potencial. Ky projekt, sipas kryeministrit, do të ofrojë mbështetje ekonomike, trajnime dhe do të fuqizojë pjesëmarrjen e të rinjve në jetën sociale dhe ekonomike të komunitetit.

“Duke marrë një jehonë pozitive nga ata që merren me organizimin e këtij program për përshtypjet tuaja, unë jam bërë një besimtar i fortë i këtij programi. Ky program ka punësuar në mënyrë përfundimtare në administratën e shtetit 1600 persona. Këta numra nuk janë pak. Por ajo që i bën më të rëndësishëm këta numra janë 1600 burime njerëzore me potencial. Kjo praktikë ka qenë një urë e ngritur me universitetin për t’u dhënë mundësi më të mirëve të kenë një sallë pritjeje ku të vetofrohen si punonjës të rinj të shtetit.

Kemi kapërcyer dhe ngërçin e eksperiencës përmes këtij programi. Edhe prania juaj këtu tregon se jeni të kënaqur me programin. Besoj se agjencia duhet të bëjë një anketim të të gjithëve për t'u marrë përshtypjet për programin. Kjo do të na ndihmonte ta përmirësonim më tutje programin.

Dua t'ju flas për një projekt të qeverisë me Komisionin Europian, që është një projekt, i cili synon të identifikojë dhe aktivizojë të rinjtë që kanë potencial, por që nuk janë aktivë në kërkimin e rrugës së nxjerrjes së më të mirës nga vetja. Ka si qëllim të ofrojë mbështetje ekonomike, trajnime, mundësi konkrete punësimi, të sigurojë vazhdimin e arsimimit profesional dhe të fuqizojë pjesëmarrjen e të rinjve në jetën sociale dhe ekonomike të komunitetit”, tha Rama. /CNA