Skandali i inceneratorit të Tiranës/ Tomorri: Po kërkohet një landfill privat për mbetjet

24 Prill 2025, 22:48, Aktualitet CNA

Skandali i inceneratorit të Tiranës/ Tomorri: Po kërkohet

Gazetari Klodian Tomorri ka hedhur dritë mbi skandalin e thelluar të mbetjeve në qarkun e Tiranës, duke theksuar se situata në landfillin e Sharrës ka dalë jashtë kontrollit.

I ftuar në emisionin në MCN TV, Tomorri deklaroi se tashmë është e nevojshme të gjendet një landfill privat për të depozituar mbetjet urbane, dherat dhe inertet.

Sipas tij, kriza nuk lidhet vetëm me dështimin e projektit të inceneratorit të Tiranës, për të cilin janë paguar mbi 100 milionë euro pa u ndërtuar kurrë objekti, por edhe me mungesën e përgjegjësisë institucionale.

Ai theksoi se nga marsi i vitit 2022, menaxhimi i mbetjeve nuk ka qenë më përgjegjësi e asnjë ministrie.

"Nuk është vetëm "larje duarsh" me inceneratorin, por lidhet edhe me të ardhmen. Çfarë ka ndodhur me inceneratorin e Tiranës? U paguan paratë dhe nuk u ndërtua. Janë bërë mbetjet kapicë atje. Agjencia që administron landfillin, ka marrë vendim që të mos pranojë më. Dherat nuk pranohen më dhe inertet, ata kanë filluar i hedhin ku të gjejnë vend nëpër lumenj, pa kriter. Ne paguam 100 e ca milionë euro dhe nuk u zgjidh problemi i mbetjeve. Tani duhet gjetur vend i ri për mbetjet urbane, dherat, inertet e me rradhë.

Tani ka lindur problemi, çfarë do të ndodhë. Këta krijuan Agjencia Kombëtare e Menaxhimit të Mbetjeve dhe i kanë dhënë përgjegjësinë e menaxhimit të mbetjeve. Kjo agjenci do të lidhë kontrata për të gjetur zgjidhje për mbetjet. Po përflitet që mund të ketë licensë të re për landfillin privat. Është kjo agjenci që do të lidhë kontratën.

E dyta, është e paprecedentë, duket e pabesueshme. Që nga mars 2022, mbetjet nuk kanë qenë në fushën e përgjegjësisë së asnjë ministrie, janë lënë jetim. Pasi e lanë tre vjet rresht jashtë çdo përgjegjësie… Si të lihet energjia pa autoritet që të vendosë.

E hoqën në 2022 nga Ministria e Infrastrukturës dhe Energjisë dhe nuk e vunë askund. Gjatë kësaj kohe ka patur përplasje mes Ministrisë së Infrastrukturës dhe Ministrisë së Mjedisit dhe Turizmit, që nuk pranonte ta merrte, sepse ishte çështja e inceneratorit. Të gjithë e dinin që do të kishin me vete pataten e nxehtë të inceneratorit.

Prandaj krijuan një agjenci. Kanë vënë Ersi Sulejmani drejtor, që bëri sherrin në Shkodër dhe i drejtuan armët. Ka patur dhe shumë akuza nga opozita për të”- tha Tomorri./CNA