web counter
LEXO PA REKLAMA!

SHKARKO APP

App Store
Google Play

Situata nga reshjet në Qarkun Lezhë/ Banesa të rrethuara nga uji, çahet argjinatura e lumit Drojë

8 Janar 2026, 09:08, Aktualitet CNA

Situata nga reshjet në Qarkun Lezhë/ Banesa të rrethuara nga uji,

Territori i Qarkut Lezhë vazhdon të jetë i përfshirë nga reshjet e shiut. Sipas të dhënave të Stacionit Meteorologjik Ushtarak Gjadër, gjatë 24 orëve të fundit kanë rënë 29 mm shi.

Nga Salla Operative e Policisë Kurbin dhe strukturat e Emergjencave Civile të bashkisë raportohet se rreth orës 06:00, një familje në afërsi të Hidrovorit të Drojës, Fushë-Mamurras, ka kërkuar ndihmë pasi ishte e rrethuar nga uji. Shërbime bashkiake po organizohen për t’u ardhur në ndihmë.

Problem mbeten gjithashtu banesat në afërsi të rrugës Laç–Mamurras, në lagjen nr.5 Sanxhak dhe në fshatin Gjorm, ku janë të rrethuara nga uji 5–6 banesa. Këto janë ndryshimet e regjistruara gjatë natës, që nga raportimi i fundit.

Shqetësuese mbetet çarja e argjinaturës së lumit Drojë, nga krahu i majtë i rrjedhjes (Durrës), e cila ka sjellë mbingarkesë në hidrovorët e Drojës dhe Shëllinzës dhe ka shkaktuar rritje të nivelit të ujit në tokat bujqësore të zonës së Adriatikut, si dhe në fshatrat e Njësisë Administrative Fushë-Kuqe.

Nga Bashkia Lezhë raportohet se gjatë natës, ekipet e MZSH dhe Emergjencave Civile kanë ndërhyrë për largimin e ujit nga një banesë në Shëngjin dhe një palestër në qytetin e Lezhës. Ekipet kanë verifikuar gjithashtu rastet e rrëshqitjes së tokës pranë banesave në fshatrat Torovicë, Tresh dhe në lagjen Shehër të qytetit.

Nga Salla Operative e Policisë Mirditë dhe Emergjencat Civile të Bashkisë Mirditë nuk janë raportuar probleme që nga njoftimi i fundit.

Sipas DRUK, të gjithë hidrovorët në Qarkun Lezhë kanë punuar pa ndërprerje, por më problematikë mbeten Hidrovorët e Drojës dhe Shëllinzës në Bashkinë Kurbin, pasi po funksionojnë në kuota kritike për shkak të dëmtimit të argjinaturës së lumit Drojë./CNA 





Lajmet e fundit nga