web counter
LEXO PA REKLAMA!

SHKARKO APP

App Store
Google Play

E fundit!

x

Simpozium Shkencor Ndërkombëtar në Korçë/ Liqenet e Prespës, nën lupën e studiuesve nga Shqipëria dhe rajoni

2 Shkurt 2026, 14:18, Aktualitet CNA

Në qytetin e Korçës, në ambientet e Universitetit “Fan Noli”, zhvillohet Simpoziumi i Tretë Shkencor për Liqenet e Prespës, duke rikthyer pas më shumë se 20 vitesh një traditë të rëndësishme të bashkëpunimit shkencor për mbrojtjen e njërës prej zonave më të vyera natyrore në Ballkan.

Aktiviteti përkon me Ditën Ndërkombëtare të Ligatinave dhe ka mbledhur për tri ditë studiues, ekspertë dhe akademikë nga Shqipëria, Maqedonia e Veriut dhe Greqia, të cilët ndajnë të njëjtin shqetësim për gjendjen aktuale të liqeneve të Prespës dhe sfidat që ato po përballen për shkak të ndryshimeve klimatike dhe presionit njerëzor.

Simpozium Shkencor Ndërkombëtar në Korçë/ Liqenet e

Simpoziumi kthehet pas një ndërprerjeje të gjatë kohore, duke ndjekur traditën e dy konferencave të para shkencore të zhvilluara në vitin 1997, që hapën rrugën për shpalljen e Parkut Kombëtar të Prespës dhe më pas për krijimin e parkut ndërkufitar midis Shqipërisë, Maqedonisë së Veriut dhe Greqisë. Gjatë punimeve të simpoziumit, studiuesit do të prezantojnë studime të detajuara mbi biodiversitetin, hidrologjinë, cilësinë e ujërave dhe ndikimin e ndryshimeve klimatike në ekosistemin e liqeneve.

Simpozium Shkencor Ndërkombëtar në Korçë/ Liqenet e

Një ndër shqetësimet kryesore, që u theksua nga drejtuesi i PPNEA-s, Aleksandër Trajçe, është rënia drastike e nivelit të ujit në Liqenin e Prespës së Madhe, një fenomen që po rrezikon ekuilibrin natyror të zonës.

“Sot është një ditë e shënuar për gjithë botën, sepse shënohet Dita Ndërkombëtare e Ligatinave dhe mendojmë se është një moment shumë i mirë për të rikthyer një traditë shumëvjeçare për mbajtjen e simpoziumit shkencor për liqenet e Prespës. Ky është simpoziumi i tretë, që vjen pas më shumë se 20 vitesh. I pari është mbajtur në vitin 1997 dhe i hapi rrugën shpalljes së Parkut Kombëtar të Prespës dhe parkut ndërkufitar midis Shqipërisë, Maqedonisë së Veriut dhe Greqisë. Prespa është një zonë që mban flamurin e ruajtjes së natyrës në Ballkan, për shkak të vlerave të saj unike. Në këto tri ditë kemi mbledhur shumë studiues që do të paraqesin aspekte të ndryshme të biodiversitetit, hidrologjisë dhe zhvillimeve më të fundit shkencore. Zona po përballet me sfida të shumta, pasi vitet e fundit niveli i ujit në Liqenin e Prespës së Madhe ka pësuar një rënie drastike, për arsyet e së cilës ende nuk kemi një shpjegim të plotë”,-tha Trajçe.

Simpozium Shkencor Ndërkombëtar në Korçë/ Liqenet e

Në fokus të diskutimeve është edhe domosdoshmëria e bashkëpunimit ndërkufitar, pasi liqenet e Prespës ndahen nga tri shtete dhe problemet e tyre nuk mund të trajtohen në mënyrë të ndarë. Eksperti grek Giorgos Katsadorakis vlerësoi organizimin e kësaj konference, duke theksuar se ajo duhej të ishte mbajtur prej vitesh, për shkak të situatës shqetësuese që po kalojnë liqenet.

“Jam nga Greqia dhe punoj për shoqatën e mbrojtjes së Prespës. Konferenca shkencore është shumë interesante sepse është diçka që duhet ta kishim bërë më herët. Tani është koha të bashkojmë shkencëtarë nga të tria shtetet që ndajnë liqenet e Prespës. Kemi probleme të përbashkëta: më pak borë, më pak reshje shiu dhe rënie të ndjeshme të nivelit të ujit për shkak të krizës klimatike. Banorët e zonës, herët a vonë, do të duhet të përshtaten me këto ndryshime, por ne duhet të mbrojmë vlerat natyrore dhe të harmonizojmë masat menaxhuese me jetesën e tyre”,-tha eksperti.

Simpozium Shkencor Ndërkombëtar në Korçë/ Liqenet e

Arjan Merolli, ekspert i mjedisit, vlerëson se Prespa përbën një nga ekosistemet më unike në Europë dhe se ruajtja e saj ka një rëndësi strategjike jo vetëm për zonën, por edhe për ekosisteme të tjera të lidhura me të, si liqeni i Ohrit.

“Është me shumë interes që për herë të tretë organizohet një konferencë shkencore e fokusuar në vlerat e biodiversitetit të rajonit të Prespës. Ky është një nga dy ekosistemet unikale në Europë, për të cilat në vitin 2014, Shqipëria dhe Maqedonia e Veriut përgatitën nominimin për shpalljen e rezervës ndërkufitare të biosferës. Jam këtu për të prezantuar disa studime që lidhen me batimetrinë e liqenit të Prespës dhe indikatorët mbi nivelin dhe cilësinë e ujërave. Prespa është një shembull i zhvillimit të qëndrueshëm, ku përdorimi i burimeve natyrore duhet të jetë i balancuar. Mbrojtja e liqenit të Prespës ka një rëndësi shumë të madhe edhe për liqenin e Ohrit, pasi rreth 78% e ujërave të tij furnizohen nga Prespa”,-tha Merolli.

Simpoziumi Shkencor i Liqeneve të Prespës synon të krijojë një platformë të përbashkët bashkëpunimi mes shkencës, institucioneve dhe komunitetit lokal, për të garantuar ruajtjen afatgjatë të një zone me vlera të jashtëzakonshme natyrore dhe një zhvillim të qëndrueshëm për brezat e ardhshëm./CNA 





Lajmet e fundit nga