Kërkesa e gjykatësve për rritje rroge/ Rama: Çudi e madhe, kërkojnë paga në stratosferë

2 Shkurt 2026, 08:31, Aktualitet CNA

Kryeministri Edi Rama në një lidhje të drejtpërdrejtë ka folur për kërkesat e gjykatësve për rritjen e pagave.

Sipas Ramës, në Shqipëri pagat e gjykatësve sot janë të njëjta me pagat e gjykatësve në Greqi dhe dyfish më të larta se në Maqedoninë e Veriut dhe Malin e Zi.

Ai theksoi se SPAK-u nuk i është bashkuar kërkesës së gjykatësve që duan rritje pagash në stratosferë. Ndër të tjera thekson se uron që Gjykata Kushtetuese të mos i lërë këtë njollë turpi shoqërisë dhe t’i bëjë për ilaçe të tjera.

“Nëse të tjerët janë dhe s'janë ne që votohemi apo tjerët janë në punë tjera ku performojnë, gjykatësit janë vetë zot e vetë shkop. Dua ta dinë të gjithë se e vërteta është që në Shqipëri pagat e gjykatësve sot janë të njëjta me pagat e gjykatësve në Greqi. Janë dyfish më të larta sesa pagat e gjykatësve në Maqedoni dhe Malin e Zi.

Në 2016 ku ne zgjodhëm një sistem reference që ishte bazuar për t'u dhënë gjykatësve paga më të larta dhe në këtë mënyrë i ngritëm mbi presidentin, deputetët dhe të gjithë tjerët për t'u dhënë një sinjal të fortë të vullnetit për të pasur jo vetëm një drejtësi të pavarur, por që gjykatësit të ndodhen të mbështetur duke pasur paga super ky thotë ta bëjmë përgjithmonë.

Çfarë kërkojnë gjykatësit është rreth 1800 euro rritje për gjykatësit e Shkallës së Parë, 2000 mijë euro rritje për gjykatësit e Apelit, 3000 euro rritje për gjykatësit e SPAK-ut, BKH-së etj.

SPAK-u nuk i është bashkuar kësaj iniciative absurde dhe meriton respekt. Gjykatësit duan të imponohen mbi Parlamentin, qeverinë, dy pushtetet e tjera dhe duan të marrin rroga sipas mendimit të tyre. Ndërkohë që një tjetër thotë pse nuk e ke parasysh që ne bëjmë dhe lekë.

Ne fitojmë dhe i sjellim buxhetit të shtetit para, nga ato para thotë të na rritet paga. Kjo është një çudi e madhe. Për të treguar se diferenca 37 milionë euro plus ngan pagat, mbulohet nga ajo që i kthejmë ne buxhetit të shtetit. Nuk është ndonjë dëm thotë.

Sipas këtij zotërisë, edhe tatimoret që i sjellin shumë të ardhura buxhetit pse mos t’i kenë pagat më shumë se të tjerët, po edhe policia pse të mos i marrë gjithë gjobat për vete, po mësuesit që nuk i sjellin të ardhura të drejpërdrejta buxhetit, po pensionistët, si i bëhet? 37 milionë i doni ju për t’i çuar pagat në stratosferë ndërkohë që këtu ka plot njerëz të tjerë që kontribuojnë që nuk prodhojnë të ardhura nga gjoba, por prodhojnë të tjera gjëra në të mirë të shoqërisë, po atyre si do t'u rritet paga.

Uroj që Gjykata Kushtetuese të mos i lërë këtë njollë turpi të madhe shoqërisë dhe të mos na bëjë për ilaçe të tjera”, tha Rama./ CNA