Si asnjëherë më parë, Linda Rama rrëfen për raportin me nënën e ndjerë të Kryeministrit

20 Janar 2026, 14:15, Aktualitet CNA

Si asnjëherë më parë, Linda Rama rrëfen për

Linda Rama, si asnjëherë më parë, ka rrëfyer për raportin me nënën e ndjerë të kryeministrit Edi Rama, zonjën Aneta.

Në intervistën e saj për emisionin “Aromë Gruaje”, zonja Rama rrëfeu se gjatë jetës së saj ka humbur njerëz shumë të afërt të familjes.

“Më rikthyet tek ajo intervistë, për ta thënë më gjatë. Unë aty kam thënë që 'një njeri i madh është produkt i një babai të madh dhe i një nëne të madhe'. Dhe unë e besoj këtë. Të madh në dimensione, të cilat ne i gjejmë edhe në jetën e përditshme, pra pasqyrimin e dimensioneve të prindit te fëmija. Unë e kam prekur vdekjen kur kam qenë adoleshente, për herë të parë. Kam humbur xhaxhain tim në moshë shumë të re. Xhaxhai im ishte 29 vjeç kur aksidentalisht u largua nga ne. Dhe unë e mbaj mend dhe është hera e parë që flas për këtë. S’kam folur kurrë as në shtëpi për këtë moment. Por është një moment që më konfirmohet. Unë e mbaj mend kur kjo ndodhi dhe ka qenë një segment kohe i caktuar me atë rast, ku për mua, edhe adoleshente, bota e humbi kuptimin, nuk kishte më kuptim. Ishte një moment ku unë thashë, jeta s’ka më kuptim. Dhe po ai moment kur m'u duk sikur bota ndaloi. Literalisht, mua m'u duk sikur ndaloi. Dhe kam kuptuar me kalimin e kohës që ai kuptim, ai segment kuptimi, nuk vjen më. Ti nuk je më kuptimplotë në mënyrën se si e zhvillon jetën. Ti e ke të cunguar. Unë kam humbur gjyshërit e Reas. Ata kanë qenë një prezencë e jashtëzakonshme në jetën time gjithashtu. Unë kam humbur kolegun me të cilin themelova zyrën para disa viteve. Ka humbur një pjesë e kuptimit për mua me largimin e tij dhe duhet ta gjej mënyrën si ta plotësoj këtë humbje, por nuk është e njëjta gjë. Kam humbur gjyshërit e mi, të gjithë gjyshërit e mi. Nuk e ka bota më të njëjtin kuptim sesa kur i ke të gjithë ata që janë prezenca të rëndësishme në jetën tënde”, rrëfen Linda Rama.

Më tej ajo zbulon se me nënën e kryeministrit Rama shkëmbente biseda shumë të gjata, dhe në këto biseda me të çdo njeri tjetër ishte i tepërt.

Zonja Rama theksoi se i mungon jashtëzakonshisht shumë nëna e ndjerë e kryeministrit në një mënyrë të pazëvendësueshme.

“Me mamanë e Edit unë bisedoja shumë gjatë. Kuptoheshim mirë, ishim në procesin e njohjes së njëra-tjetrës. E kemi marrë kohën për ta njohur njëra-tjetrën. Dhe për këtë shkak dhe arrinim të kishim një raport intensiv dhe kur themi intensiv, nuk është thjesht kohë, po kohë e jetuar, kohë e jetuar me bisedë, me mendim, me emocione, me kujdes. Kur ne ishim të dyja me mamanë e Edit, ishte shumë e habitshme, gjithkush tjetër bëhej i tepërt dhe ajo e kishte të rëndësishme këtë. Në momentin që ne ishim të dyja, megjithëse mund t’i donte që të gjithë njerëzit që mund të ndodhnin aty, ishte shumë e natyrshme që gjithkush të ishte i tepërt. Sepse aty ishim ne, të dyja. Dhe biseda, dhe koha, dhe momenti, ishte për ne të dyja. Në fillim është dhimbja. Kur e humbet këtë, është një dhimbje e madhe. Unë nuk do ta bëja këtë rrëfim dhe nuk e kam bërë këtë rrëfim kur ishte viti i parë kur kjo ndodhi. Tani jam pak më e qartë, në kuptimin se si përballohet. Është një dhimbje e madhe dhe ke nevojë të luftosh me dhimbjen që shkakton largimi. Duhet të përcaktoje një rutinë të re. Sepse ti kishe humbur një pjesë të rëndësishme të rutinës tënde. Duhet të mbaje në ekuilibër njerëzit e tjerë, Edin. Ishte një humbje shumë e madhe për Edin dhe të gjithë të tjerët në familje. Pastaj, fillon dhe ballafaqohesh me mungesën. Është dhimbja në fillim. Nuk të lë dhimbja të ndiesh mungesën. Dhimbja dhe nevoja për të rivendosur një rutinë të re. Pastaj të vjen mungesa. Ty të mungon. Atëherë çfarë do të bësh? Do të fillosh, do të merresh, do të gjesh mënyrën tënde si ta sjellësh. Duhet të lexosh shenjat se si vjen ajo te ti. Këtë do ta gjesh vetë. Është puna jote. Po ama është një punë e përditshme që duhet ta bësh, ose sa herë që ti e ndien këtë pjesë të nevojës tënde. Për t’iu përgjigjur pyetjes suaj, a të mungon mamaja e Edit? Mua më mungon jashtëzakonisht shumë. Në një mënyrë të pazëvendësueshme më mungon mamaja e Edit. Por unë e kam gjetur dhe gjej tërë kohën mënyrën për ta sjellë në çdo lloj forme mamanë e Edit në të përditshmen time. Kjo është ajo që unë në fakt, e kam bërë për mamanë e Edit, e bëj për gjyshërit e Reas, e bëj për gjyshërit e mi. Unë e gjej mënyrën, e kërkoj. E mendoj se si t’i risjell. Me një shije, me një ushqim, me një bisedë, me një send, me një kujtim, me një rrëfim. E gjej. Po ata janë tërë kohën pjesë e të jetuarit”, ka treguar zonja Rama./ CNA