“Pas 3 dekadash futem në godinën e RTSH-së”/ Si e kujton Linda Rama

20 Janar 2026, 13:57, Aktualitet CNA

“Pas 3 dekadash futem në godinën e RTSH-së”/ Si e

Linda Rama, bashkëshortja e kryeministrit Edi Rama, ka dhënë së fundi një intervistë në RTSH, në emisionin "Aromë Gruaje".

Në hyrje të bisedës me moderatoren Ina Kollçaku, Linda Rama tregoi emocionet që përjetoi teksa hynte në godinën e RTSH-së pas 3 dekadash.

Zonja Rama ka ndarë me publikun përmes intervistës se si e kujton ajo godinën e RTSH-së, duke theksuar se telvizioni është pjesë e jetës së saj dhe përjetoi shumë emocione kur pas gati 30 vitesh shkel sërish në këtë godinë.

“Unë futem në godinën e Televizionit Publik Shqiptar, Radio Televizionit Publik Shqiptar, pas 3 dekadave. Mund të jetë fiks 3 dekada me një diferencë muajsh. Kam qenë këtu në vitin 1995 për të shpjeguar skemën e privatizimit masiv, e cila drejtohej nga unë, në një komunikim me gazetarin që mbulonte çështjet e ekonomisë.

Komunikimi ishte live, sepse kishte edhe ndërhyrje nga publiku, të themi, populli i interesuar për procesin e privatizimit, sepse ishte masiv si proces. Unë vajta vizitova edhe studion. E mbaja mend shumë mirë. Mbaja mend korridorin, mbaja mend hollin e vogël. Mbaja mend dhe studion që ishte një studio e madhe. Dhe regjisorja Vasilika më shoqëroi deri aty dhe kjo godinë është një godinë, sipas meje, e mbushur me emocione. Ato e dominojnë.

Ndërkohë që mendoj se prezenca e radio-televizionit në jetën time është shumë e hershme. Është mbase që përpara se unë të filloja shkollën, mbase 5 vjeçe, 6 vjeçe, për shkak të xhaxhait tim, Hasan Basha, që ishte në ekipet e para të televizionit, radio-televizionit, teknik zëri, së bashku me grupin tjetër të çunave, siç i njihnim ne në shtëpinë time; Petraqi, Shefki Petrela, të gjithë tironsa. Gëzim Kallfa, Lul Balla kameramani, Besnik Shima, një pjesë e të cilëve në fakt kanë lënë kujtimet mes nesh. M’u zgjuan të gjitha ato figura që ishin në oborrin tonë, që komunikonim.

Televizioni ishte aty te ne, me të gjitha ngjarjet që ndodhnin, dhe ne kishim edhe shtëpinë shumë afër televizionit. Shtëpia e prindërve të mi, e gjyshërve të mi, është te Liceu Artistik. Kështu që televizioni është pjesë e jetës sime dhe unë isha shumë e emocionuar kur shkela këtu pas kaq shumë viteve, edhe kur preka atë momentin tim të parë", u shpreh Linda Rama./ CNA