web counter
LEXO PA REKLAMA!

SHKARKO APP

App Store
Google Play

Shteti Bektashi brenda Tiranës/ Ramkaj: Në 13 vite nuk janë bërë përpjekje për të forcuar pozitat e bashkësive fetare

25 Shtator 2024, 19:23, Aktualitet CNA
Shteti Bektashi brenda Tiranës/ Ramkaj: Në 13 vite nuk janë
Arben Ramkaj

Drejtuesi i Qendrës së Bashkëpunimit Ndërfetar në Elbasan, Arben Ramkaj ka komentuar deklaratat e fundit të kryeministrit Edi Rama për krijimin e shtetit Bektashi gjatë një takimi me shqiptarët në New York.

Ramkaj shprehet se, prej 13 vitesh nuk është bërë asnjë përpjekje për të forcuar pozitat e bashkësive fetare, ndaj kur vjen një propozim i tillë në qiell të hapur do të ketë një reagim të tillë.

“Dëgjova me vëmendje fjalimin e Kryeministrit, i cili ishte i ftuar nga aktivisti shqiptar Mark Gjonaj në New York. Megjithë irritimin e disa anëtarëve në sallë, ashtu si shumë shqiptarë sot, Kryeministri ndryshoi qëndrimin e tij për nevojën e një urdhri sovran bektashi. Ndryshe nga citimi në New York Times, ku pretendoi për promovimin e një Islami tolerant, sot ai tha se kjo nevojë vjen për shkak të zhdukjes së komunitetit bektashi gjatë dekadave. Ky argument është gjithashtu i diskutueshëm, për faktin se, megjithë egërsinë e regjimit komunist, realiteti fetar i shqiptarëve nuk ka ndryshuar thelbësisht gjatë 100 viteve të fundit.Plus që komuniteti Bektashi kishte një rritje të admirueshme në censin e fundit ndryshe nga çdo komunitet tjetër fetar.

Gjatë viteve, në daljet e mia publike, kam bërë disa propozime që i konsideroj të shëndetshme për të shmangur debatet që nxisin paqartësi dhe replika me karakter fetar, të cilat janë realisht të dëmshme për të ardhmen. Njohja zyrtare e statusit të klerikut është thelbësore, si një rikthim i dinjitetit të tij pas shtypjes së dhunshme komuniste. Kthimi i pronave të konfiskuara nga komunitetet fetare me pak mbështetje të qëndrueshme duhet të ishte realizuar me koh .

Mosndërhyrja e komuniteteve fetare në çështjet shtetërore është një parim themelor që duhet të ruhet, duke mbajtur ndarjen mes fesë dhe shtetit. Rritja e buxhetit për mbështetjen e komuniteteve fetare është një domosdoshmëri, duke krijuar një fond të dedikuar për ruajtjen e objekteve të religjionit dhe promovimin e edukimit fetar. Për më tepër, krijimi i një sekretariati shtetëror që ndjek çështjet e religjioneve do të garantonte liri dhe barazi për të gjitha komunitetet fetare në përputhje me Kushtetutën.

Megjithatë, gjatë këtyre 13 viteve nuk është bërë asnjë përpjekje për të forcuar pozitat e bashkësive fetare.Prandaj kur vjen një propozim i tillë në qiell të hapur, është e logjikshme që shoqëria të reagojë, dhe kjo nuk ka asnjë lidhje as me historinë e as me statusin që bashkësia Bektashiane ka pasur që nga vitet 20, kur bashkësitë fetare e kanë dakordësuar qëndrimin e tyre”, është shprehur Ramkaj./ CNA





Lajmet e fundit nga