web counter
LEXO PA REKLAMA!

SHKARKO APP

App Store
Google Play

E fundit!

x

Shkeljet u lanë në hije/ KPK shpërfilli ONM-në për Alfred Ballën

30 Janar 2024, 13:16, Aktualitet CNA
Shkeljet u lanë në hije/ KPK shpërfilli ONM-në për
Alfred Balla

Alfred Balla, ministri hije i Rilindjes në krye të Këshillit të Lartë të Prokurorisë, arriti që të sfidonte edhe vëzhguesit e Operacionit Ndërkombëtar të Monitorimit.

E kemi fjalën për procesin e vetting-ut, të cilit Balla arriti me një sërë manovrash që të mos i nënshtrohej, duke përdorur kthim-përgjigje me e-maile, mosparaqitje nëpër seanca, padi në Gjykatën Administrative apo edhe kërkesa në Këshillin e Lartë të Gjyqësorit.

Pikërisht, këto ka bërë kreu i Këshillit të Lartë të Prokurorisë, i cili edhe pse drejton një nga institucionet kryesore sa i përket fushës së hetimit, shmangi transparencën dhe nuk kaloi në sitën e deklarimit të pasurisë, pastërtisë së figurës dhe aftësitë profesionale.

Edhe pse mban një pozicion kyç në fushën e drejtësisë, ende nuk dihet pasuria e tij, si e ka siguruar atë, sa me profesionalizëm ka kryer punën e tij.

Por, na lindin edhe disa pyetje: Pse trembet Balla që t'i nënshtrohet këtij procesi? Nga çfarë ka frikë? Për momentin mund të ndihet edhe "i relaksuar", pasi është pjesë e strofullës së Rilindjes, por nëse vijon të mbajë poste drejtusese, në një moment do t'i duhet të deklarojë pasurinë e tij. 

Le të kthehemi te Vëzhguesit e Operacionit Ndërkombëtar të Monitorimit.

Kreu i Këshillit të Lartë të Prokurorisë, ishte sipas legjislacionit në fuqi subjekt i vetting-ut për shkak të punës së tij si ndihmës ligjor në Gjykatën e Lartë deri në 31 korrik 2017 dhe duhej t'i nënshtrohej procesit të rivlerësimit. 

Në këtë linjë më 6 qershor të vitit 2022, vëzhguesit e Operacionit Ndërkombëtar të Monitorimit u shprehën të vendosur që Balla t'i duhet nënshtrohej procesit të rivlerësimit.

"Në lidhje me rrethanat konkrete që mbështesin këtë mendim, monitoruesi ndërkombëtar vlerëson se analiza e dokumenteve të administruara/disponueshme dhe analiza e ligjit të aplikueshëm, mbështesin konkluzionin se z.
Alfred Balla, ka pasur në vazhdimësi statusin e subjektit të rivlerësimit dhe prandaj Komisioni duhet të vazhdojë procesin e tij të rivlerësimit", u tha nga vëzhguesit. 

Edhe pas manovrave të Ballës me e-maile, padisë në Gjykatën Administrative dhe kërkesës në KLGJ, për njohjen e statusit të Këshilltarit/Ndihmësit jomagjistrat pranë Gjykatës së Lartë, duke menduar se në këtë mënyrë nuk  e kapte ligji për t'ju nënshtruar Vetting-ut, ONM nuk u tërhoq nga analiza dhe përfundimi se Balla duhet t'i nënshtrohej me patjetër këtij procesi. 

"Alfred Balla ështësubjekt rivlerësimi dhe, si i tillë, duhet t’i nënshtrohet procesit të rivlerësimit. Për më tepër, statusi që z. Balla kishte në momentin e hyrjes në fuqi të ndryshimeve kushtetuese, nuk është hequr apo zhdukur gjatë kohës dhe nuk është ndikuar nga fakti që z. Balla nuk ushtronte më detyrën e Ndihmësit ligjor jomagjistrat dhe u bë anëtar i Këshillit të Lartë të Prokurorisë", u theksua nga ONM.

Këtu hyn në lojë Komisioni i Pavarur i Kualifikimit. 

Fillimisht ky komision, pas marrjes edhe të opinionit nga ONM-ja për Ballën, njoftoi këtë të fundit që nuk e pranon kërkesën e këtij dhe se do vazhdohet me procesin e rivlerësimit.

"Pas administrimit të këtij opinioni të vëzhguesit ndërkombëtar, trupi gjykues i Komisionit, me email-in e datës 9.11.2022, ka njoftuar subjektin e rivlerësimit, z. Balla, ndër të tjera, se [...] Trupa gjykuese... mori në shqyrtim kërkesën tuaj për përfundimin e procesit tuaj të rivlerësimit pa një vendim përfundimtar, dërguar me email e datës 10.1.2022. Kjo trupë gjykuese, pas shqyrtimit të kërkesës tuaj vendosi mospranimin e kërkesës tuaj dhe kryerjen e procesit të rivlerësimit për ju si një subjekt i ligjit nr. 84/2016", njoftoi KPK-ja. 

Manovra tjetër që bëri Balla

Pas marrjes së përgjigjes nga KPK-ja, ai kërkoi që procesi i vetting-ut ndaj të tij të pezullohej deri në përfundimin e procesit gjyqësor dhe daljen e gjykatës me një vendim të formës së prerë lidhur me çështjen e pasjes ose jo nga ana e tij të statusit të Këshilltarit të Gjykatës së Lartë.

Duke parë këtë situatë, nuk mungoi edhe një rekomandim nga ONM-ja. 

"Ankimi i bërë nga subjekti i rivlerësimit Alfred Balla nuk është nga ato që ligji në fuqi i parashikon shprehimisht si të pranueshme në këtë fazë të procedimit. Prandaj ankimi duhet të refuzohet nga Komisioni, e cila rekomandohet të mos dërgojë dosjen në Kolegj për të shmangur vonesat e panevojshme, dhe të vendosë sipas ligjit [...]", thuhej nga vëzhguesit. 

Më pas, në janar të 2023, ONM-ja i vendosi një ultimatum KPK-së që duhet të merrte hapa hetimorë konkretë në drejtim të vlerësimit të pasurive të subjektit të rivlerësimit, Alfred Ballës. 

Ndërkohë, kreu i KLP-së ndodhej nën procedurat e vetting-ut çështja ishte në Gjykatën Administrative të Apelit. Kjo e dyta vendosi në mars 2023 të prishë vendimin e Shkallës së Parë dhe të rrëzojë padinë. Në shkurt të vitit 2023, ai hoqi dorë nga padia dhe paraqiti në Këshillin e Lartë Gjyqësor edhe kërkesë për heqje dorë nga njohja/pasja e statusit të Këshilltarit/Ndihmësit ligjor pranë Gjykatës së Lartë.

Këtu gjeti edhe shteg KPK-ja që të merrte vendim që Balla të mos bëhej pjesë e Vettingut. Trupa gjykuese e KPK-së arsyetoi se Balla nuk kishte dhënë dorëheqjen dhe se statusin e kishte humbur për shkak se ishte shkarkuar nga kreu i Gjykatës së Lartë në korrik 2017.

"Komisioneri Publik, duke mbështetur vlerësimin e vëzhguesit ndërkombëtar, mbi statusin e subjektit dhe ecurinë e procesit të rivlerësimit, konstaton se arsyetimi i Komisionit se: [...] subjekti i rivlerësimit, z. Alfred Balla, ka humbur përfundimisht statusin e subjektit të rivlerësimit lidhur me funksionin e tij të mëparshëm, nga i cili u shkarkua (edhe pse është ende në sistem, por për shkak të një ngjarjeje të mëvonshme ligjore nga Kuvendi) [...], nuk gjen mbështetje në ligj, në jurisprudencën e Kolegjit, dhe as në rrethanat faktike të rastit konkret" vendimi i KPK-së. 

Pra, është KPK-ja është institucioni që shpërfillimi opinionet e ndërkombëtarëve për Alfted Ballën. ONM-ja këmbënguli në anë proceduriale që Balla t'i nështrohej procesit, por  “misionari” i radhës i pushtetit kundër SPAK-ut, gjeti hilet për të shpëtuar. 

Në të gjithë këtë proces nuk mungoi edhe një hap nga Komisioneri Publik i kërkoi Kolegjit të Posaçëm të Apelimit në qershor të vitit të kaluar që ndryshohen dy vendime të KPK-së për Alfred Ballën.

E para është që të mos ndërpritet procesi i rivlerësimit për Ballën. Komisioneri Publik, Florian Ballhysa, i kërkon KPA-së ndryshimin e vendimit të KPK-së për Alfred Ballën dhe që ndërprerja e procesit të vetting-ut ndaj tij të shoqërohet me sanksionin që i ndalon emërimin në sistemin e drejtësisë për 15 vjet./CNA





Lajmet e fundit nga