web counter
LEXO PA REKLAMA!

SHKARKO APP

App Store
Google Play

Rikonstruksioni i dy pasurive kulturore në Shkodër/ KLSH kallëzon në Prokurori shkeljet: Pasoja të parikuperueshme

30 Tetor 2022, 16:28, Aktualitet CNA
Rikonstruksioni i dy pasurive kulturore në Shkodër/ KLSH kallëzon
Foto ilustruese

Kontrolli i Lartë i Shtetit, ka kallëzuar në Prokurorinë e Rrethit Gjyqësor Shkodër, shkeljet e kryera në rikonstruksionin e dy pasurive kulturore, "Kafja e Madhe" dhe objektit brenda kufirit të qendrës hitorike Shkodër.

Kontrolli i Lartë i Shtetit, ka ushtruar gjatë vitit 2022 auditimin e performancës me temë “Mbrojtja dhe administrimi i Monumenteve të Kulturës”.

Subjekt i këtij auditimi ishte Ministria e Kulturës dhe disa prej institucioneve të saj të varësisë si: Drejtoria Rajonale e Trashëgimisë Kulturore Shkodër, Instituti Kombëtar i Trashëgimisë Kulturore (IKTK) dhe Instituti Kombëtar i Regjistrimit të Trashëgimisë Kulturore (IKRTK).

Në materialin e siguruar nga CNA.al, thuhet se "Nga auditimi i kryer në subjektet e sipërcituara, janë konstatuar shkelje lidhur me procedurën e miratimit dhe zbatimit të projektit “Rikonstruksioni i fasadës dhe Çatisë së objektit brenda Qendrës Historike Shkodër”, duke sjellë pasojën e rëndë të tjetërsimit të karakteristikave të objektit, pjesë e ansamblit historik rruga “Gjuhadol”, deklaruar si pasuri kulturore me VKM nr.771, datë 30.09.2020 “Për deklarimin pasuri kulturore të Qendrës Historike të Qytetit të Shkodrës, Përcaktimin e Zonës Mbrojtëse  të saj dhe miratimin e planit për ruajtjen, mbrojtjen dhe administrimin e tyre”.

Auditimi i KLSH-së, ka evidentuar gjithashtu shkelje gjatë procesit të zbatimit të punimeve për realizimin e projektit të restaurimit të objektit “Kafe e Madhe”, të cilat kanë sjellë pasojën e parikuperueshme të shembjes së objektit monument kulture i kategorisë I.

Për sa më sipër, Kontrolli i Lartë i Shtetit ka depozituar në Prokurorinë pranë Gjykatës së Shkallës së Parë Shkodër kallëzimin penal për veprën penale “Shkatërrim i veprave kulturore”, e kryer në bashkëpunim, parashikuar nga neni 160 i Kodit Penal./ CNA.al

 





Lajmet e fundit nga