Raporti i DASH-it për Shqipërinë/ Meta: Një tjetër rekord i zi i qeverisë me pasoja afatgjata për ekonominë

27 Korrik 2023, 13:19, Aktualitet CNA

Raporti i DASH-it për Shqipërinë/ Meta: Një tjetër

Kreu i PL-së, Ilir Meta, ka reaguar në lidhje me raportin vjetor të Departamentit Amerikan të Shtetit për Shqipërinë për vitin 2023.

Përmes një shkrimi në rrjetet sociale Meta shprehet se ky raport është një tjetër rekord i zi i qeverisë me pasoja të rënda dhe afatgjata për ekonominë.

Ish-presidenti shkruan se konkluzionet e këtij raporti janë një kambanë e fortë alarmi për rrezikun e falimentimit të Shqipërisë dhe nevojës jetike të kthimit të ekonomisë në normalitet në funksion të zhvillimit të qëndrueshëm.

“Përkeqësimi i klimës së investimeve në Shqipëri për shkak të korrupsionit të lartë dhe të përhapur në çdo sektor, sipas raportit vjetor të Departamentit Amerikan të Shtetit, është një tjetër rekord i zi i Qeverisë me pasoja të rënda dhe afatgjata për ekonominë.

Vendimet arbitrare, politikat fiskale jotransparente dhe klienteliste që cenojnë konkurrencën dhe sipërmarrjen e lirë, prokurimet, koncensionet dhe PPP-të abuzive, megaafera e inceneratorëve që nuk ndalet, fluksi i madh i të ardhurave të paligjshme nga trafiku i drogës, kontrabanda e lartë, evazioni fiskal, si dhe zhvlerësimi dramatik dhe i qëllimshëm i euros sigurisht që do të sillnin këtë klimë mbytëse për investitorët e brendshëm dhe të huaj.

“Investitorët e huaj e cilësojnë Shqipërinë si një vend të vështirë për të bërë biznes. Ata përmendin korrupsionin e vazhdueshëm duke përfshirë sektorin publik, gjyqësorin, prokurimet publike, konkurrencën e pandershme dhe të shtrembëruar, ekonominë e madhe informale, pastrimin e parave, ndryshimet frekuente të legjislacionit fiskal si dhe zbatimin e dobët të kontratave si sfida të vazhdueshme për të bërë biznes në Shqipëri”, - thuhet në raportin e DASH-it.

Këto të dhëna tronditëse vijnë vetëm pak kohë pasi edhe Bashkimi Evropian ndaloi investimet në bujqësi për shkak të korrupsionit.

Konkluzionet janë një kambanë e fortë alarmi për rrezikun e falimentimit të Shqipërisë dhe nevojës jetike të kthimit të ekonomisë në normalitet në funksion të zhvillimit të qëndrueshëm.”-shkruan Meta./CNA.al