Rama: Harmonia fetare, sistem i rëndësishëm sigurie për paqen e një vendi

5 Prill 2026, 21:07, Aktualitet CNA

Rama: Harmonia fetare, sistem i rëndësishëm sigurie për

Kryeministri Edi Rama e ka cilësuar bashkëjetesën fetare si një sistem shumë të rëndësishëm sigurie për paqen në vendin tonë.

Në një intervistë për Top Channel ku ka folur për librin e tij “Në Sofrën e Hënës”, Rama tha se kjo vlerësohet edhe nga ndërkombëtarët të cilët janë gjithnjë e më të interesuar të dinë për harmoninë fetare në Shqipëri.

”Unë e përmend dhe mbase duhet ta përmend edhe më shumë, sepse unë e konsideroj njëkohësisht një sistem shumë të rëndësishëm sigurie për paqen, për vazhdimësinë e patrazuar të popullit tonë, sepse janë të panumërta rastet kur larmia fetare e një bashkësie ka krijuar plagë të jashtëzakonshme, ka sjellë vdekje, ka sjellë shkatërrim, ka sjellë trazira të pashërueshme. Dhe është si diçka e jashtëzakonshme që kur e ke nuk e vlerëson. Ka shumë gjëra të jashtëzakonshme që ne i kemi dhe nuk i vlerësojmë. Por nuk duhet asnjëherë ta harrojmë dhe unë asnjëherë nuk e harroj, se çfarë ferri do ishte Shqipëria sikur kjo vllazëri, apo kjo harmoni fetare siç e quajti Papa Françesku kur erdhi këtu, të shpërbëhej dhe në vend të saj të ishte mosdakordësia, konflikti, lufta, do ishte një llahtar. Ndërsa të huajt, besoj që tani e kanë perceptuar dhe e kanë bërë të veten një pamje për Shqipërinë që është shumë më afër realitetit, se sa pamja që kishin deri jo shumë vite më parë, kur na respektonin formalisht, kur as na besonin dhe as na vlerësonin. Dhe ndërkohë përsëri kanë nevojë të dëgjojnë më shumë për vllazërinë, për harmoninë fetare, për çfarë kemi bërë ne për hebrenjtë, për sa shumë jemi ne të përkushtuar ndaj perëndimit, për sa shumë kemi hequr ne si komb dhe si vend nga e kaluara, nga diktatura, për se si e kemi mësuar gjithçka në ekstrem për shkak të faktit që ishim në anën e gabuar të historisë, kur u izoluam dhe u rreshtuam me diktatorët, me gjakatarët e botës. Janë gjëra që duhet t’i ndihmojmë që t’i shohin dhe t’i dijnë për ne”, u shpreh Rama.

Ndër të tjera, kryeministri u shpreh se nuk besoj që besimi i njerëzve në Zot është ulur për shkak të internetit

“Unë nuk besoj që njerëzit sot besojnë më pak se sa përpara daljes së internetit, madje madje ka studime që thonë se rritja e fuqive të shkencës për të shpjeguar fenomene, nuk e ka ulur besimin e njerëzve në Zot. Përkundrazi, ka sot më shumë njerëz që besojnë në Zot se sa kishte përpara se sa të ndodhte ky shpërthim. Por nuk besojnë më ndoshta një pjesë tek rruga e Kishës, e Xhamisë, e Sinagogës, pra tek tempujt, tek institucionet. Gjë që lidhet edhe me një krizë të përgjithshme të intitucioneve në përgjithësi, të shtetit në përgjithësi, sidomos në vendet ku ka liri, ka demokraci. Ndërkohë që ka shumë njerëz që besojnë tek besimi në kuptimin që besojnë se të besosh nuk është diçka e gabuar”, tha Rama. /CNA